Shillong, Lber 14
U MLA ka Liang Pyrshah ba mihkhmat ïa ka Nongthymmai konstitwensi, Bah Charles Pyngrope u la ong ba ka Sorkar ka dei ban kynthup lang ïa baroh khlem da leh shiliang, khnang ban lah bad ban poi sha ka thong kaba T.85 hajar klur lane 10 Billion US Dollar ha ka ïoh ka kot ka Jylla ha u snem 2028.
Haba kren sha ki lad pathai khubor hadien ba la kut ka Dorbar Mang Tyngka 2025-26, u Bah Charles u la ong ba kaba donkam ïa ka Sorkar ka long ba kan treikam da ka lynti kaba khuid bad kaba shai lang.
“Nga sngew ba lada bud ha ka rukom kaba dei kane ka Mang Tyngka kan dei kaba myntoi. Haba nga ong kumta, ngi hap ban ïaid ryngkat bad ka jingsot ba bniah na ka dorbar bad pynthikna ban bud da ka kam. Ka Mang Tyngka kaba buh thong ban pynpoi ïa ka ïoh ka kot sha ka 10 Billion Dollar ka dei ban urlong. Ka don ka lad bad lah ban urlong lada pyntreikam bha da ka jingkhuid bad lada kynthup lang ïa baroh, ka mang tyngka kaba kot sha ka T.85 hajar klur ka dei ban urlong”, la ong u MLA ka Trinamool Congress (TMC).
Haba kylli, u Bah Charles u la pynpaw ba ha kane ka dorbar u hun ïa ka jubab na ka Liang Synshar, ha kaba u la ong ruh ba ka Liang Pyrshah ka la leh bha ha kane ka dorbar ha kaba ki mat ba la rah ki long kiba donkam bad kongsan ban ai jingmut bad kdew ïa ki jingduna ha ka Sorkar. Haba kylli halor ka jingpynkylla ïa ka Meghalaya State Investment Promotion Facilitation (Amendment) Bill, 2025, u MLA Liang Pyrshah u la ong ba ka jingpynshai bad ka Amendment ïa ka Amendment Bill jong ka Sorkar ka long kaba donkam, namar ym lah ban shu thied jaka katba mon, hynrei hap ban bud beit ïa ki kyndon.
“Ym lah ban shu thied jaka katba mon, wat la ka lah ban shim por hap ban bud beit ïa ki kyndon katkum ka aiñ. Phi hap ban ïaid katkum ki kyndon katkum ka aiñ kaba la buh, kum ka Land Transfer Act, 1971 bad ka Land Acquisition Act, 2013”, la ong u Bah Charles.
