Mudui ejahar ka kurim u Colonel pyrshah ïa u Brigadier ka Assam Regiment ba kynnoh leh khlemakor

Shillong, Lber 14

Uwei u heh ophisar shipai jong ka Assam Regiment (AR) uba bat ïa ka kyrdan Brigadier u la shah kynnoh ba u la leh khlemakor bad byrngem ban pynthohbria ïa ka longrynïeng jong kawei ka longkmie kaba dei ka kurim jong u ophisar shipai uba kham rit ha ka kyrdan.

Katkum ka ejahar ba mudui ha thanat Madanrting ha ka 10 tarik mynta u bnai, ka nongmudui kaba dei ka kurim jong u ophisar uba bat ïa ka kyrdan Colonel, ka la pynpaw ïa ki jingjia ki bym ïahap bad ka jingkren tohmet, ka jingktah kti bad ka jingbyrngem ka jong u heh ophisar shipai.

Ka nongmudui ka la kynnoh ba katei ka jingshah leh donbor ka la jia ha ka miet jong ka 8 tarik mynta u bnai ha ka por ba don ka jingbam ja lang ha ka Officers’ Mess jong ka Assam Regimental Centre. Ka la pynpaw ba utei u heh ophisar u la wan tur bunsien sha ka ryngkat bad ka kren da ki ktien ki bym sngewtynnat wat hapdeng ka jingpyrshang ban kiar na u. Kane ka jingjia ka la nang heh, haba utei u ophisar u la sdang ban kren da ki ktien kiba khlemakor bad pyrshang ruh ban ktah kti, hynrei ïa kane la lah ban teh lakam noh da u kurim jong ka.

Ha ka ejahar ka nongmudui ka la kdew ruh ba ha kawei ka jingjia ha ka 13 tarik u Ïaïong 2024, ha ka por ba ki la leit bamja kaba la khot sngewbha da uwei pat u ophisar, utei ujuh u heh ophisar u la kren da ki ktien pharshi ïa ka. Ha kawei pat ka jingjia ha ka 13 tarik u Naitung 2024, ka la kynnoh ba utei u heh ophisar u la pyrshang ban bat jubor ïa ka kti jong ka hakhmat jong u kurim jong ka ha ka por bamja ha ka ïing jong ka.

Hadien ba la ïohpdiang ïa katei ka jingmudui, ki pulit ki la pynrung mukotduma ïa utei u ophisar hapoh ka Section 75(2) (Sexual Harassment), Section 79 (Insulting the modesty of a woman) bad ha ka Section 351(2) (criminal intimidation) jong ka Bharatiya Nyaya Sanhita (BNS), 2023.

Katei ka longkmie ka la pynpaw ruh ba ka jingpynslem ban mudui ïa ka ejahar ka dei namar ba ka la shah ktah ha ka jingmut jingpyrkhat na katei ka jingjia, ha kaba ka la shim por ïa ka ban long biang kumba ka ju long bad ban thoh ïa katei ka jingmudui.

Ka nongmudui ka la dawa ban shim kam mardor ïa utei u Brigadier, ha kaba ka la pynpaw ruh ba ka don ka jingsheptieng ïa la ka jingim, ka jingpynthohbria ïa ka longrynïeng jong ka bad ka jingshah leh khlemakor khamtam haba une nongleh u dei uba sah marjan bad ka.

Ha kaba ïadei bad kane, ka jingtohkit na ka liang ki pulit ka dang ïaid shakhmat.