Tura, Lber 14
Ka Garo Students’ Union (GSU) – Siju Regional Unit ka la ujor sha ki pulit ka South Garo Hills hadien ba la lap ïa ki dohkha (ïap) kiba per ha sla-um jong ka Wah Simsang hajan Siju.
Ïa kane ka jingujor la ujor ha ka Sngi Palei, ha Siju PS da u General Secretary ka Unit, u Welbing Sangma uba la kynnoh ba ki don katto-katne ki runar kiba la pynjaboh ïa ka um jong ka Wah – kaba la pynlong ïa kiba bun ki jait ki dohkha jong ka thaiñ ban ïap bad per ha sla-um.
“La ïohi ba ka um ha ka Wah Simsang ka la shah pynjaboh da kaei-re-kaei kaba la pynlong ïa kiba bun tylli ki dohkha ban ïap. Kane ka jinglong-jingman kaba ishyrkhei ka la pynmih ïa ka jingbitar ha ki paidbah bad buh ruh ki jingkylli kiba sngewkhia halor ka jingshngaiñ jong ka um ha Wah Simsang,” ong u Welbing ha ka jingujor jong u.
Ka GSU ka la pynskhem ba kane ka mat kam shym la ktah tang ïa ka jinglong-jingman jong ki jingthaw ba im hapoh um (ha ka thaiñ) hynrei ka buh ruh ka jingma kaba khraw ïa ka koit ka khiah jong ki paidbah.
“Ngi suba jur ba ka jingjaboh ka lah ban dei na ka jingbret ïa ki tiar jakhlia (be-aiñ) sha katei ka Wah bad kumta ngi dawa ïa ka jingtohkit ban lap ïa kiba donkti ha kane ka kam. Shuh-shuh ngi kyntu ïa phi ban shim ïa ki lad jingïada ban pyntikna ïa ka jingshngaiñ jong ki paidbah bad ki jingthaw ba im ha um,” bynrap biang u Welbing.
