Jowai, Lber 14
Kum shi bynta ka jingpyndep ïa ka jingshakri ba 10 snem jong ka Rashtriya Bal Karyakram (RBSK), ha ka 12 tarik Lber ka Rashtriya Bal Swasthya Karyakram, (RBSK) Meghalaya kala pynlong ka prokram pynkup burom ha GHM Guest House, Myntdu, Jowai.
Kane ka prokram ka long ban ithuh ïa ka jingtrei shitom bad ban burom ïa ka jingnoh synñiang jong ki nongtrei ka tnat ka koit ka khiah, ki Mobile Health Team ki kynhun treimon sngewbha na Jaiñtia Hills bad Ri Bhoi District na ka bynta ka jingaiti jong ki ban shimkhia ban jurip ïa ki khynnah naduh ba kha haduh 18 snem ka rta bad ban pynsngewthuh ruh halor saw tylli ki jait jingpang kiba tip kum ki 4Ds.
Haba kren kum u kongsan Ma F. Passah, Assistant Commissioner, u la ïaroh ïa ka RBSK halor ka jingshimkhia jong ki bad pynpaw ka jingkmen ban tip ba kane ka prokram ka pynlah ban ithuh ha ka por kaba biang ïa uwei pa uwei u khynnah uba donkam ïa ka koit ka khiah.
U Passah u la ai khublei ïa ka kynhun na ka bynta ka jingaiti bad jingpyrshang khlem sangeh jong ki ban poi sha ki jaka kiba jngai, wat lada ki hap ban ïaid ïa ki jingeh kiba bun kynthup ïa ka jinglong jingman jong ki surok.
Ka Dr. I Gatphoh, State Nodal Officer, RBSK ha ka jingkren ka pynpaw ka jingsngew sarong halor ka jingdap 10 snem ka jingshakri jong ka prokram ka RBSK. Kane ka prokram ka long ban aiti na ka bynta ka koit ka khiah bad ka jingbha jingmiat jong ki khynnah kaba la sdang ha u snem 2013 hapoh ka jingpynïaid bad ïohi jngai jong ka Sorkar India. Ka la pynpaw ruh ïa ka jingsngewkmen halor ka jingjop jong ka prokram ha kaba ïada ïa ka koit ka khiah jong ki khynnah.
Kala ong ba ka jingjop jong kane ka prokram ka long lyngba ka jingtrei shitom jong ki kynhun jong ka Mobile Health, ki doktor, ki nurse, ki pharmacists bad ki nongtrei ASHA. Ka Dr. Gatphoh ka la pynpaw ruh ïa ka jingangnud jong ka RBSK lyngba kane ka prokram ban pynthikna ïa ka lawei kaba koit ba khiah na ka bynta ki khynnah ha kylleng ka jylla Meghalaya.
Shuh shuh, ka Dr. Gatphoh ka la pynpaw ba ha kine ki shisnem ba la leit noh, kane ka prokram ka la long kaba jop bha bad ka la don ka bynta kaba kongsan ha kaba ithuh kloi ïa ki 4Ds ne ki saw tylli ki jait jingpang kata Defect at Birth ka jingduna ha ka met ka phad ha ka por ba dangkha, Deficiencies ka jingduna bam, vitamin bad kiwei, Diseases ki jait jingpang kiba lah ban don ne kiba dang sdang ha ki khynnah bad Developmental Delays and Disabilities ki dak ki shin kiba lah ban ktah ïa ka jingheh jingsan jong ki khynnah.
Ka la pynpaw ruh ïa ka jingkmen ban tip ba ki khynnah kiba shitom klongsnam bad ka jingkad ha ki shyntur ki la ïoh ïa ka lad jingsumar.
U Dr. H L Suting, Manager jong ka DEIC, Jowai u la batai ïa ka jingdonkam ban pynkhlaiñ ïa ki rukom ai jingsumar kaba naduh dangkha ban ïoh ïa ka jingkoit jingkhiah kaba biang.
