Shillong, Lber 14
Ka Pt. Deen Dayal Upadhyay Community College (DDUCC) bad Skill Development Centre, Wahïajer ki la ïoh ban pynlong ïa ka jingai jinghikai halor ka phang ‘Organic & Integrated Farming in Modern Agriculture’ ha kaba ki nongrep jong ka shnong Wahïajer ki la wan ban ïashim bynta ha kane ka sngi.
Ha kane ka sngi ki nonghikai jong ka North Eastern Hills University (NEHU) ki la ïoh ban ai ka jingai jinghikai sha 300 ngut ki nongrep na kylleng jong ka Rilum Jaiñtia. Ki la pyni ruh ïa ki lad ki lynti kiba lah ban leh da kaba pyndonkam hi da ki kti briew ha ka rep ka riang bad kumjuh da kaba pyndonkam ïa ki kor ki bor ka juk thymmai ha ka rep ka riang kat kum ki por mynta. Lyngba kane ka workshop, ki nongrep ki la ïoh ïa ka jingshai bad jingtip ha kaba ïadei bad ki rukom rep tynrai. Ka jingthmu jong kane ka prokram ka long ban pynkupbor ïa ki nongrep jong ka imlang ka sahlang lyngba kum kine ki prokram da kaba pynroi ïa ki jingtbit jong ki khnang ba yn lah ban kyntiew ïa ka ïoh ka kot.
Ha kane ka sngi la ïoh ruh ban plie ïa ka “GOLDEN JUBILEE COMMUNITY HALL” ïa kaba la ai sngewbha da ka Jaiñtia Hills Cement Manufacturer’s Association (JHCMA) ha kaba u R. K. Pareek, President, JHCMA u la long kum kongsan ïa u Prof Prabha Shankar Shukla uba la don bynta lang lyngba ka ‘online’, u Prof. H. Lamin (Retd.), Founder Principal I/c, DDUCC, u Bah Andriew Sari, Secretary, shnong Wahïajer bad kiwei kiwei pat.
Haba kren lyngba ka ‘online’, u Prof. P. S. Shukla u la ong ba ka donkam ban kyntiew ïa ka rep ka riang katkum ka juk mynta hynrei donkam ruh ban pynneh pynsah ïa ki rukom rep bathymmai khnang ba yn lah ban pynthikna ïa ka jinglong tynrai. U Prof Shukla u la ong ruh ba kane ka jingnoh synñiang jong ka JHCMA ka long ban kyntiew ïa ka shnong Wahïajer khamtam eh ha ka liang ka pule-puthi jong ki nongshong-shnong ka rilum Jaiñtia. “Nga pynpaw ruh ka jingangnud ban pynlong ïa ka DDUCC kum ka shlem ka die ka thied ïa ki mar-rep kiba la pynmih na kane ka jaka, kane kan wanrah ka jingmyntoi ym tang ïa ka Rilum Jaiñtia hynrei ïa ka jylla bad ka thaiñ shatei lam mihngi baroh kawei,” u la pynkut. La ïoh ruh ka jingkren na u R. K. Pareek, President ka JHCMA, uba la pynpaw ïa ka jingai khublei ïa ki nongpynïaid jong kane ka kolej na ka bynta ki jingjop jong ki bad ka jingpyrshang kaba ïai bteng ha kaba shim ïa ki jingthmu kiba treikam ban pynkupbor ïa ki samla bad ki nongrep jong ka imlang-sahlang lyngba kine ki ‘Programme’ bapher-bapher ba la pynbeit na kapor sha kapor.
Ha kane ka sngi la ïoh ruh ka jingkren na u Bah Andriew Sari, u Prof. H. Lamin (Retd.), Prof. D. Walia, Prof. B.P. Sahu bad U Dr. F. R. Sumer bad kiwei- kiwei.
