Shillong, Lber 16
Kum shi bynta ban kyntiew ïa ka thaiñ shatei lam-mihngi (NE) bad kumjuh ïa ki jingbei tyngka sha kane ka thaiñ, ka Development of North East Region (DONER) ka la thaw da ka Task Force, ka kynhun ba san ngut ki dkhot, ha kaba la jied ïa u Myntri Rangbah ka Tripura u Manik Saha kum Convener.
Nalor u Convener, kiwei pat ki dkhot jong kane ka Task Force ki kynthup ïa u Myntri ka tnat DONER u Jyotiraditya Scindia, u Myntri Rangbah ka Meghalaya u Conrad K Sangma, u Myntri Rangbah ka Nagaland u Neiphiu Rio bad u Myntri Rangbah ka Sikkim u Prem Singh Tamang.
Ka jingthaw ïa kane ka Task Force, ka dei kaba la rai ha ka jingïalang jong ka Plenary kaba 72 jong ka North Eastern Council kaba la long ha u bnai Nohprah, 2024 ha Agartala. Kane ka Task Force kan treikam hynriew bnai ban lum jingkheiñ, ban bishar bniah ïa ka rukom bei tyngka kaba la don lypa, kynthup ïa ki polisi, bad ki jingtei ha ka thaiñ shatei lam-mihngi bad kan thaw ïa ka lynti treikam kaba kongsan ban buh ïa ka thaiñ kum ka kam ba la jied bha ban bei tyngka, ka rep ka riang, ka IT bad kiwei.
Ka kynhun treikam kan pynpaw ïa ki bynta bad ki thaiñ kiba don hapoh ka thaiñ hi baroh kawei ban thaw ïa ki kynhun bei tyngka kiba la pynleit jingmut na ka bynta ban kyntiew ïa ki jaka pdeng jong ki bynta kum ki jaka pynmih mar rep, ki jaka jngohkai pyrthei, ki jaka IT, ki lynti ïaid jong ka bording ba lah ban pynthymmai bad kiwei kiwei.
Kane ka Task Force kan ai jingmut ruh ban thaw ïa ki lad ki lynti ban khring ïa ka jingbei tyngka napoh ri bad nabar ri, da kaba pynleit jingmut ha ka jingïatreilang hapdeng ki riew shimet (PPPs), la ong ka jingpynbna jong ka tnat DONER.
Shuh shuh kane ka Task Force kan sa aiti ïa ka kaiphod na ki jinglap jong ka bad ruh ki jingai jingmut jong ka sha ka NEC hapoh ka por kaba la buh.
