Shillong, Lber 16
Ka North Eastern Hill University Teachers’ Association (NEHUTA), North Eastern Hill University Non-Teaching Staff Association (NEHUNSA) bad ka North Eastern Hill University Students’ Union (NEHUSU) ki la kyntu ïa u Acting Vice-Chancellor ka NEHU, Prof. N. Saha ban pynsangeh ïa ka jingsiew tulop sha u Vice-Chancellor, Prof. Prabha Shankar Shukla, Registrar, Omkar Singh, bad Deputy Registrar, Amit Gupta naduh u bnai Lber mynta u snem.
Ki nongïalam jong lai seng ha ka shithi ba la phah sha u Prof. Saha, ki la kdew ba u Prof. Shukla u la leit shuti (Earned Leave) ha ka 15 tarik u Naiwieng, 2024, hadien ka jingai jingmut na u Director ka tnad pule Higher Education ka Sorkar India.
Ki la ong ruh ba ïa ka shuti jong u, kaba la pynjlan haduh ka 2 tarik Lber, 2025, ka la kut noh, ha kaba u khlem wanphai ne pyntip pat sha ka ophis treikam ka NEHU ha Shillong. “Kane ka la ïalam sha ka jingpep kaba la bteng mynta la 130 sngi,” ki la ong da kaba bynrap ba u Prof. Shukla, u Omkar Singh, lem bad u Amit Gupta ki la pyndonkam lut ïa baroh ki shuti jong ki.
Ki la kdew ruh ïa ka Central Civil Services (CCS), 1972, bad ka CCS (Conduct, Classification, and Appeal) Rules, 1965, kaba ong ba ki nongtrei Sorkar kiba pep trei sah wat hadien ba la kut ka shuti ne kiba pep sah khlem jingmynjur ki dei ban ngat ha ka jingpynshitom bad ym dei ban pyllait ïa ka jingsiew jong ki.
Ka shithi ka la kdew ruh ïa ki kyndon ba kyrpang hapoh ka CCS Leave Rules, kynthup ïa ka FR 17(1), kaba ong ba u ophisar uba pep khlem jingbit, un ym don hok ban ïoh kano-kano ka jingsiew. Hapoh ka FR 17-A, ïa ka jingpep khlem jingbit lah ban kheiñ kum ka jingsangeh ha ka jingshakri.
Ha kajuh ka por, ka kyndon 25 ka ong ba ka jingpep trei palat khlem ka jingmynjur ka wanrah ïa ka jingduh jong ka tulop shuti bad ka lah ruh ban ïalam sha ka jingpynshitom.
Ki nongïalam jong ki lai seng ki la ban jur ba ka jingbym don jong u Prof. Shukla ka hap hapoh kine ki jingpynkheiñ aiñ, kaba pynlong ïa u ban ym bit ban ïoh ïa ka tulop. Ki la maham ruh ba ka jingbym pynsangeh ai tulop sha ki kan buh ïa ka nuksa ka bym itynnad. Na ka liang jong ki, ki la byrngem ruh ban shim shuti kumjuh bad ban trei na jngai da kaba ïalam bakla lada pynjem ïa ki kyndon na ka bynta ki heh ophisar.
Shuh shuh ki la dawa ruh ban pynsangeh lut ïa baroh ki jingpynkynriah ïa ki ‘file’ sha u Prof. Shukla bad ban khanglad ïa u ban pyndonkam bakla ïa ki ïingsah ka skulbah bad ki jingdon-jingem hapdeng ka jingshim shuti jong u.
Ki la ban jur ba u Prof. Shukla u dei ban siew ïa kino-kino ki jinglut-jingsep shimet kiba u la pynlut ha ka por shuti jong u, kynthup ïa ka bai leit bai wan bad bai sah.
Ha kane ka shithi, ki la kyntu ruh ïa ki bor pynïaid ka NEHU ba kin bud pyrkhing ïa ki kyndon jong ka Sorkar khnang ban lait na ka jingkulmar ha ka skulbah.
Nalor kane, ki la pynskhem ba ym don uwei ruh u nongtrei Sorkar, khlem da kheiñ ïa ka kyrdan, uba long halor jong ki kyndon bad ba ka jingbym leh eiei kan pyntlot ïa ka jinglong hok jong ka skulbah.
