Shillong, Lber 16
U Nongïalam ka Liang Pyrshah, Dr. Mukul Sangma, u la ong ba ka long kaba donkam ïa baroh ar tylli ki Sorkar Jylla, kata ka Meghalaya bad Assam ban tih bniah, halor ki jingshah kynnoh leh bym hok ka skulbah University of Science and Technology Megha-laya (USTM) Ri-Bhoi district.
Lah ban kdew ba ka USTM kaba don ha Meghalaya ka la shah kynnoh leh bym hok ha kiba bun bynta ha ka Sorkar Assam ha kaba u Myntri Rangbah ka Jylla Assam u Himanta Biswa Sarma u la byrngem ruh ba ki syrnot jong kane ka skulbah kim ibit ban thep kam Sorkar.
Haba pynpaw ka jingsngewdiaw halor ki jingshah kynnoh ka USTM, u Nongïalam ka Liang Pyrshah, Dr Mukul u la ong ka Sorkar Meghalaya kam lah ban shu long ka nongpeit kai halor kine ki jingshah kynnoh.
U Dr. Mukul u la ong ba ïa ka USTM la seng hadien ba ka ïingdorbar thawaiñ ka Jylla ka la mynjur ïa ki aiñ ban ailad ïa ki nongkynshew pisa ban seng skulbah shimet.
U la ong ba ka jingthmu ban seng ïa ki skulbah shimet ha kylleng ki Jylla ka Ri kumjuh ha Meghalaya ka dei ban plie lad ïa ki samla ban ïai bteng ïa la ki jingpule ha ki kyrdan bapher bapher khnang ban lah bad ïakhun ban ïoh kam, la ka dei ha ki tnat Sorkar ne ki kompeni shimet.
“Namarkata, ka donkam ïa baroh ar ki Sorkar Jylla ban tih bniah, halor kine ki jingshah kynnoh ka USTM khnang ba ki paidbah kin tip ïa ka jingshisha bad khnang ba ki kmie ki kpa ki ïoh biang ïa ka jingshaniah ïa ka skulbah ha shuwa ban phah pule ïa la ki khun hapoh kane ka skulbah”, la ong u Dr Mukul.
Haba kylli halor ki daw ba ka skulbah ka shah kynnoh lym bym hok, u Nongïalam ka Liang Pyrshah u la ong, “Lada shu peit na jngai, lah ban ong ba ïa ka USTM imat dei ba kwah pynlong politik. Namar kata donkam ban tohkit khnang ban tip, kaei kaba dei, kaei kaba lait”.
