Nongstoiñ, Lber 16
Ki ‘riewngeit ka Balang Katholik na ki Parish bapher bapher jong ka Jyllaniam Nongstoiñ ha ka Sngi U Blei da ki hajar ngut ki la ïa tuid bad wan ha ka sngi pynkyntang Lyngdoh Sohblei ïa u Dikon Dominic Myrthong ïa kaba la pynlong ha Mother of Compassion Mawkhlam Parish.
Ïa katei ka jingpynkyntang Lyngdoh Sohblei la pynlong ha madan skul Don Bosco Mawkhlam ha West Khasi Hills ha kaba la sdang ruh ïa ka jingleh niam da ka jingïaid proseshon bad u Dikon Dominic Myrthong u la pule ïa ka Gospel.
Nangta, u Lyngdohsad jong ka Jyllaniam Nongstoiñ u Wilbert Marweiñ u la ai ïa ka kyntien sneng-kraw bad u la pharia ïa ka Ktien U Blei bad u la pynkyntang Lyngdoh ïa u Dikon.
U Lyngdohsad haba batai ïa ka jingmut ka jinglong Lyngdoh, u la ong uei u Lyngdoh Katholik ne u Phadar nyngkong eh u dei u briew bad u briew uba la shah jied ha U Blei uba la pule la shah hikai bad uba la nang, la pynkyntang da u Bishop jong ka Jyllaniam, u dei uba la thung da u Bishop ban shakri ïa ka Balang bad ïa ka kynhun balang jong U Blei. U Lyngdoh u dei u Kpa Mynsiem uba ïalam ïa ki briew sha U Blei bad uba im katkum ka jinghikai U Jisu bad ka Balang Katholik.
Katto-katne ki kam jong u Lyngdoh ba nyngkong eh u dei nongduwai ban ïalam ïa ki briew ha ka ban shakri ïa U Blei. U dei u nongkñia ïa ka Mass Bakhuid ba lyngba kane ka jingpynkyntang ïa u, u don ka bor ban pynlong ïa ka jingkñia jong ka Mass Bakhuid ban sam ïa ka Ïukharist Bakhuid sha ki paid jong u Blei namar ym don uba lah ban pynlong ne ban kñia ïa ka jingkñia jong ka Ïukharist ka Mass Bakhuid khlem da pynkyntang Lyngdoh.
Shuh shuh ha kane ka sngi hadien ka sneng ka kraw, ka ïing ka sem lyngba ki kmie ki kpa, u Lyngdoh thymmai kata u Phadar Dominic Myrthong, ki la pynphong ïa ki jaiñ Lyngdohniam ïa la u khun bad u Lyngdohsad u la pynsleh da ka umphñiang Khrisma bad pynkhamti ruh ïa u Kpu bad ka Khuri.
U Lyngdoh thymmai ha katei ka sngi u la ïoh ruh ban pdiang ïa ka jingtyrwa, katba ïa ka jinglehniam ban kdiah ïa u kpu ban kñia ïa ka Mass Bakhuid la pyndep da u Lyngdohsad ka Jyllaniam Nongstoiñ u Wilbert Marweiñ ryngkat ka jingsakhi lang kiwei kiwei pat ki Lyngdoh.
Shuh shuh ha ka jingïaseng ha ka nohphai sngi pat u phadar Dominic Myrthong uba la long u Lyngdoh Sohblei uba nyngkong eh jong ka Mother of Compassion Mawkhlam Parish u la pynïaid ïa ka jingmane Sakrament bad u la ai ka jingkyrkhu. Haba ai jingkren u Lyngdoh thymmai u la ong, “Kum u briew kumno ngi dei ban long? Ban sngewnguh ïa U Blei ne ban klet ïa U Blei? Peit ïa uwei u briew uba na ki 10 ngut kiba la ïoh jingpynkhiah da u Jisu, u la wan phai pat sha u Jisu ban pynpaw ka jingsngewnguh bad u la dem ngon hakhmat U Jisu hynrei kiwei pat ki khyndai ngut ynda ki la ïoh ka jingkoit ki la klet noh ïa u Jisu.”
“Ka jingim jong ngi ruh kum ki hynmen ki para shibun bah ngi ïoh ki jingkyrkhu na U Blei, shibun bah ki jingaiei ba u la theh kyrhai halor jong ngi wat haba ngi long kiba pop bad kiba duna hynrei u Jisu um ju klet ïa ngi, u kynmaw ïa ngi barabor bad um ju iehnoh ïa ngi marwei phewse bunsien dei ma ngi ba iehnoh ïa u,” u la ong.
Ha katei ka sngi pynkyntang Lyngdoh, la ïadonlang ruh u phadar Anselm Nonglang Vicar General, u phadar Jobi Mathew OFMCAP 1st Councilor, u phadar Nicholas Maïong Parish Priest ka Mother of Compassion Mawkhlam Parish bad kiwei kiwei ki phadar, ki sister, ki brother bad ki ‘riewngeit da ki hajar ngut kiba la wan ban sakhi lang ïa katei ka sngi kyrpang.
Shuh shuh ha katei ka sngi u Lyngdoh thymmai u la ïoh ruh ban ot ïa u cake kaba long ruh kum ka dak ka jingleh kmen sngewbha jong ka jingjop.
