Shillong, Lber 16
U heh shipai ka Border Security Force (BSF) ha ka 12 tarik mynta u bnai u la leit da ka helicopter ha ka shnong Umkiang ha East Jaiñtia Hills ban jurip ïa ka jingker sainar shiah kaba don ha khappud bad ka Bangladesh.
Kane ka jinghiar u heh shipai sha Umkiang, ka lah ban dei na ka jingkren jong u MP ka Lok Sabha na Shillong Parliamentary Konsti-twensi Dr. Ricky A Syngkon uba la kren hapoh ka ïingdorbar Lok Sabha halor ka jingeh ba ki nongshong shnong ka jylla kiba shong ha ki jaka khappud bad ka jylla Assam kumjuh kiba shong ha khappud bad ka Ri Bangladesh ki ju ïakynduh bad shah pyndik da kaba shah pynjot ki jaka rep, shah skud jaka bad khamtam eh don kiba la duh noh ïa la ka jingim.
Haba ïoh ban ïakren bad u Waheh Shnong ka shnong Umkiang, Bah Lasting Pala lyngba ka phone u la ïathuh ba u heh shipai jong ki BSF u la wan ha ka 12 tarik Lber bad u la sah miet shimiet ha Umkiang ha kaba u la leit phai noh ha ka por 10.30 mynstep jong ka sngi babud.
U la ïathuh ba u heh shipai u la khot ïa u ban leit jurip lang ïa ka jingker ha khappud bad ka ri Bangladesh hynrei namar ba u khlem don ha shnong ba u leit donkam sha Shillong, um shym la ïoh lad ban leit lang.
U Bah Lasting u la ïathuh ba ki nong Bangladesh man ka por ki ju wan ban tuh na ka shnong jong ki namar ba ki jingker ba la ker ha ki jaka khuppud ki la synjor, kumta ka suk ïa ki ba kin pynjot.
Shuh shuh u la ïathuh ba ki nong Bangladesh ki kham jur bha ban wan tuh ïa ki mar rep ha India ka dei ha ka por ba dang ïaid ka jingïalap ilekshon MDC ha JHADC namar ki ïoh jingtip ba ki ‘riew rangbah na shnong kim don shuh ki suloi namar ki la leit aiti sha ka Sorkar.
Kumta mar shu kut ka ilekshon MDC kine ki nong Bangladesh kim nud shuh ban wan tuh namar ki la tip ba ki rangbah ki la ïoh biang ki suloi ba la dep aiti sha ka Sorkar.
