Bertina Lyngdoh
Phi ïeng rangbah, marwei hapdeng khlaw,
Ba tnat jongphi ki piar, bad jingmut ruh ka khraw;
Phi long uta, ba btin lynti,
Ba briew kin bud dienjat jongphi.
La sngi ka shit kyrang,
Bad eriong ruh ka beh;
Ba ïa ki bor lyngshop ka mariang,
Phi ïai ïeng, phim tieng, phim riej, phim kynrandien.
Phi long uta, uba jngai na ka pyrthei,
Hapdeng ki law sangam, phim khuslai ban im
marwei;
Phim i don por ban pyrkhat ban babe,
ïa ki sngi ki por kiba la leit.
U Dieng bilat u dei uwei na ki kynja dieng uba heh, bad ïa une u dieng la ju kham lap bha ha ki jaka khlaw lane ki jaka lum. Ha ka Ri Khasi jongngi, ïa une u dieng la ju shem bha ha ki jaka kiba marjan khap bad ka sor Shillong. Katkum na ka jingwad bniah, la shem ba u Dieng bilat wat la u san marwei ha khlaw, hynrei haba dro dur pat ïa u, u don ïa ka jinglong kiba kum ka jingïaishah, ka jingsuk, bad ka jingieit ïa kaba kine kijuh ki jinglong ki don ruh ha u rangbah briew. Namar kane, u Myllung Soso Tham u la ringdur ïa kine ki jinglong jong u Dieng bilat da kaba pynïadei bad ka jinglong u rangbah. Kumba long u Dieng Bilat, kumjuh u briew ynda u la poi ha ka rta jinglong rangbah jong u, ka jingmut jingpyrkhat jong u ka la ïar bad kham khraw, ban ïanujor bad kiwei pat ki sngi jong u kiba la leit noh. Ha kane ka rta, u briew u la kham don ka jingïaishah, ka bor sngewthuh bad sngewlem khamtam ha ka jingïadei para briew, para mynsiem, para doh, para snam. U da bad la ki kular bad um ju pynkheiñ kulmar ïa ki khlem da khlem ki daw ba biang. Ka mynsiem jong u ruh ka la nangjan sha u Blei, naduh ba u la sdang ban im ha kane ka rta. U ïai minot thop la ki kamram bad um ju don por shuh ban shim bynta ïalade ha kiei kiei kumba u ju don bynta ha ki por jinglong samla jong u. Kumba u dieng bilat u ïeng rangbah marwei, ban shah ïa ki bor lyngshop ka mariang kum ka jingshit ka sngi, ka jingbeh ka lyer, ka jingkyrhuh u pyrthat, ka jinghap u phria,– kumjuh u rangbah briew, u ïeng skhem ban ïaleh ïa ki jingeh ka pyrthei kaba wan ban tynjuh ïa ka jingim jong u kaba manla ka sngi. Ka jinglah jong u ban ïai shah ïa ki dieng pyngkiang ka pyrthei, ka pynlong ïa kiba bun ban bud ïa ka nuksa jong u.
Te namarkata, dei ïa u rangbah briew, ba briew ki burom bad pyrto. Kumta, to tip la ka akor ka burom ïa u rangbah briew. Baroh ngim lah lait ban im ha kane ka rta, te namar kata ngin long ki nuksa ïa ka pateng ka ban wan. Wat ai ba ka jingshañiah ki pateng ban wan kan duh noh na u rangbah. U rangbah u don ïa ka ïktiar ba kyrpang ban long kum u rishot ban wan rah ïa ka jingïatylli ïa kaba la sakma. Kumta, burom ïa u rangbah kumjuh ruh ïa kum une u kynja jingthaw ka meimariang naba na u ngi ioh shibun ki jinghikai.
