New Delhi, Lber 16
U Myntri ka tnat Kam Pohïing jong ka Sorkar Pdeng u Amit Shah u la ong ba kan ym don ka jingisynei ïa ki kynhun khaïi drok. Haba ai khublei ïa ka Narcotics Control Bureau (NCB) na ka bynta ka jingkurup ïa ka jingkit kaba heh jong ki dawai pynbuaid kiba shongdor T.88 klur bad ban kem ïa 4 ngut ki dkhot jong ka kynhun khaïi drok ha ka pyrthei, u Myntri ka Sorkar Pdeng u la ong ha ka post ha ka X ba ka jingkhaïi drok ka long ka jingpynshisha ïa ka jingtreikam ba pura.
Ha ka post jong u, u Amit Shah u la ong, “Ym don jingisynei ïa ki kynhun khaïi drok. Da kaba pynsted ïa ka kam jong ka Sorkar Modi ban tei ïa ka Bharat kaba lait na u drok, la kurup ïa ka jingpynkit kaba heh jong ki dawai methamphetamine ba shongdor T.88 klur, bad 4 ngut ki dkhot jong ka kynhun nongkhaïi drok jong ka pyrthei la ïoh kem ha Imphal bad Guwahati Zone. Ka jingkit drok ka long ka jingpynshisha ïa ka jingtreikam kaba pura. Ka jingwad jong ngi ïa u drok ka dang ïai bteng. Ka jingai khublei kaba khraw ïa ka kynhun NCB.”
Ki jingtip ba bniah shaphang ki jingtreikam:
Ha ka jingkhynra kaba nyngkong, ha ka 13.03.2025, katkum ka jingïoh jingtip, ki ophisar ka NCB Imphal Zone ki la bat ïa kawei ka trok hajan ka thaiñ Lilong bad hadien ba ki la wad bniah ïa katei ka kali, ki la ïoh kurup ïa u dawai Methamphetamine uba don 102.39 kilo na ka jaka buh tiar shna kali jong ka. La kem ruh ïa 2 ngut kiba shong ha katei ka trok. Khlem da pynslem, ka kynhun ka la pynlong mardor ïa ka jingbuddien bad kem ïa u briew uba la suba ba u dei ban ïoh ïa katei ka mar ba la khang na ka thaiñ Lilong. Na u la ïoh kurup ruh ïa kawei ka kali saw shaka, kaba ju pyndonkam ban khaïi drok. Ïa baroh lai ngut la kem hadien. La suba ba kine ki drok ki dei kiba wan na Moreh. Ka jingtohkit ka dang ïaid shakhmat ban kem ïa kiwei pat kiba donkti ha katei ka kam.
Ha kawei pat ka jingkhynra, ha katei ka juh ka sngi, katkum ka jingïoh jingtip, ki ophisar ka NCB Guwahati Zone ki la bat ïa kawei ka kali SUV ha khappud Assam -Mizoram hajan Silchar bad ha ka jingjurip bniah, ki la ïoh kurup 7.48 kilo ki dawai kuli Methamphetamine ba la buhrieh hapoh ka shaka jong katei ka kali bad la bat ruh ïa ka kali hadien la kem ïa u nongñiah. Kine ki drok ki dei kiba wan na Moreh, Manipur bad la suba ba mut pynkit ïa ki sha Karimganj. Ka jingtohkit ban kem ïa kiwei pat kiba donkti ha katei ka kam ka dang ïaid shakhmat.
Shuh shuh, ka NCB ka dang shimti ruh ïa ka jingtohkit ïa kawei ka mukotduma na ka tnat Excise jong ka jylla Mizoram ha kaba la ïoh kurup kumba 46 kilo u crystal meth ha Brigade Bawngkawn Aizawl ha ka 6 tarik u Lber. Ha kane ka kam la kem 4 ngut ki briew kiba donkti ha ka khaïi drok. Ïa ka jingtohkit ïa kane ka kam la shimti da ka NCB ban wad bniah ïa ka jingïadei hapdeng ki kynhun khaïi drok na kylleng ka pyrthei bad ki kynhun khaïi drok ha ka jylla.
Ka thaiñ shatei lam-mihngi ka la paw kum kawei na ki jaka ba kham shah ktah ha ka ri India na ka liang ka khaïi drok namar ka jinglong-jingman jong ka jaka. Da kaba ithuh ïa kane ka jingduna, ka tnat kam pohïing ka la pynkhlaiñ ïa ka bor jong ka NCB ha u snem 2023 ban pynkhlaiñ shuh shuh ïa ka thma pyrshah ïa u drok ha kane ka thaiñ.
Ka NCB, lyngba san tylli ki Zonal Unit bad kawei ka Regional Headquarter ha ka thaiñ shatei lam-mihngi, ka la bteng ban trei pyrshah ïa ki nongkhaïi drok kiba treikam ha ka thaiñ, khamtam eh pyrshah ïa kito kiba donkti ha ka jingkhaïi ïa ki dawai pynbuaid kum ki dawai Methamphetamine, kiba la tip paidbah kum YABA kaba la buh jingma ym tang ïa ki samla, hynrei ïa ki paidbah nongshong shnong jong ka thaiñ.
