Shillong, Lber 17
Hadien ka jingmih khubor halor ka jingkhlad noh jong uwei u khynnah pule uba dang 13 snem ka rta napoh ka Jylla ha Karnataka, ka Sorkar Jylla ha ka Lah Sngi U Blei ka la phah ïa ka kynhun ba kynthup ïa 2 ngut ki ophisar sha katei ka Jylla ban ïakynduh ïa ki bor distrik ban buddien halor kane ka jingjia.
Kum ban shu kdew hangne, ha kawei ka jingjia suba ïoh bih na ka bam, uwei u khynnah uba dang 13 snem ka rta u la khlad noh, katba 28 ngut kiwei pat jong kawei ‘ka hostel’ (ka bym don jingbit) ba la pynïaid da ka skul shimet ha Mandya ki la shah sumar ha ‘hospital’ ha ka Sngi U Blei hadien ba ki la ud pang kpoh haba ki la bam ïa ka bam kaba la pynkhreh na ka bynta ka jingrakhe ‘Holi’.
“Ha ka jingbuddien ïa ki jingtip ba la ïoh ha kaba ïadei bad ka jingïap jong u khynnah skul ba dang 13 snem ka rta na Meghalaya uba dang pule klas VI ha kawei ka ‘Residential School’ jong ka Gokul Educational Institution kaba ha ka shnong T Kagepura, Mandya distrik, Karnataka, la thaw ïa ka kynhun ba kyrpang kaba kynthup ïa ki ophisar na ka tnat pule-puthi ka Sorkar Jylla bad la phah mar-mar sha katei ka jaka ba jia katei ka jingjia,” ong u Secretary ka tnat pule-puthi ka Sorkar Jylla ha ka kyrwoh khubor.
Katei ka kynhun kan ïatreilang bad ki bor pynïaid distrik ba dei khmih bad kan ïarap ha ka ban pynbiang ruh ïa ki jingtip kiba kongsan sha ki kmie ki kpa jong ki khynnah skul na Meghalaya.
Kane ka kynhun kaba kynthup ïa u Bah P. Sunn, Sub-Inspector of Schools, Sub Divisional School Education Officer, Shillong bad Bah R. Kharsyntiew District MIS, PM – POSHAN, Shillong, kan hap ruh ban aiti ïa ka kaiphod kaba bniah halor katei ka jingjia.
“Katkum ka jingtip ba la ïoh lum haduh mynta, kane ka skul ka don baroh 202 ngut ki khynnah ha kaba 23 ngut ki dei na Meghalaya bad kiba sah ha ka ‘Hostel’ ba jia kane ka jingjia. Ïa baroh ki khynnah pule la pynkit noh mardor sha ‘Hospital’ da ki bor pynïaid distrik,” ong u Secretary.
U la ong ruh ba na ka liang ka tnat pule-puthi ka ïakren na ka por sha ka por bad u District Magistrate ka Mandya uba la pyntikna ban ai ka jingkyrshan ba pura haba ïadei kane ka bynta.
“Uwei na ki khynnah pule uba la kham shitom jur la phah noh sha ka jaka sumar kaba kham kyrpang. Baroh kiwei pat ki don hapdeng ka jinglong-jingman kaba bit ba biang,” u ka ong.
Shuh shuh u la bynrap ba ki bor pynïaid distrik ki la bthah ïa ki Nodal Officer ban pyntikna ba ïa ki lad jingïarap ba donkam ha ka liang ka koit ka khiah la pynbiang sha baroh.
