Shillong, Lber 17
Ki nongtrei bank bapher-bapher ha ka ri kynthup ha kane ka Jylla hapoh ka shatri jong ka Union Forum of Bank Unions (UFBU) ki la rai ban pynlong ïa ka jingïakhih da kaba sangeh treikam haduh 48 kynta naduh ka 23 tarik haduh 25 tarik mynta u bnai.
Kane ka rai jong ka UFBU ka long ban pynsngew ïa shikhung ki jingdawa kiba ktah ïa ka jingtreikam jong ki ‘public sector bank’ kiba don ha ka ri baroh kawei.
Na ka liang ki nongïalam jong ka UFBU, Bah Wanraplang Mawroh bad Bah Davies Lyngdoh ki la ïathuh ba kane ka jingïakhih kan long ha ka 23 tarik Lber haduh ka 25 tarik Lber ka ban long 48 kynta ban pynbor ïa ka Sorkar ba kan pynurlong ïa kiba bun tylli ki mat jingdawa ba ki la dep buh.
Katto-katne ki mat jingdawa ba ka kynhun ki nongtrei bank ki la pynsngew sha ka Sorkar ki long halor ka jingpyndap lut ïa ki kam ba lait bad kiba donkam ha ki bank, kiba hap ha ka thup jong ki ‘public sector bank’ lane kiba ju tip kum ki bank sorkar.
“Ka jingpyndap ïa ki kam ba lait bad kiba donkam, la ka long ha ka kyrdan jong ki nongtrei bad ruh ha ka kyrdan ophisar kan ïarap ïa ka jingpynïaid beit ïa ka kam bad ruh kan weng ïa ka jingkhia ha ka kam,” la ong ki Nongïalam ka Union haba kren bad ki lad pathai khubor ha ka Lah Sngi U Blei.
Ki la ïathuh ruh ba kumba long mynta, ki nongtrei bank nalor ba ki hap ban trei 6 sngi ha ka shitaïew, ki hap ruh ban peit shibun kiwei pat ki kam namar ki hap ban tuklar lut na ka daw ka jingduna ki nongtrei.
“Kumta, ha kane ka jingïakhih pyrshah ngin dawa na ka Sorkar ba kan pyntreikam ruh ïa ka san sien shi taïew ban long ka sngi trei lane kata ka Banking Industry”, ki la ong.
Na ka liang u State Secretary jong ka AIBOC, Bah Davies Lyngdoh, u la ïathuh ba lada ïanujor bad ki ‘private bank’, ka jingdon ki nongtrei ha ki ‘public sector’ bank ka la ïapher bak-ly-bak naduh u snem 2013 haduh u snem 2024.
U la ïathuh ba ha ki ‘public sector’ bank ki nongtrei ha u snem 2013 ki don 8,86,490 ngut, hynrei mynta u snem 2024 ki don tang 7,46,679 ngut. Katba ha ki ‘private bank’ ha u snem 2013 ki don 2,29,124 ngut bad ha u snem 2024 pat ki don haduh 8,46,530 ngut, kaba pyni ba ka jingbun ki nongtrei ka la kiew palat 200 percent, katba ha ki bank ‘public sector’ ka jingdon ki nongtrei ka la nang hiar arsut.
Kiwei ki mat jingdawa ki long ban weng mardor ïa ka jingbthah kaba pynmih dang shen da ka Sorkar halor ka DFS bad ïa ka PLI, kaba buh jingsyier ïa ki nongtrei ha ka kam, ban ai jingshngaiñ ïa ki nongtrei na ka jingshah thombor ha ki paidbah, ban pyndap ïa ki kam Workmen/ Officer Director ha PSB, ka jingsahteng ka IBA, ban pynkylla ïa ka Gratuity Act, ban pynneh 51% ka Equity Capital ha ka IDBI Bank ka Sorkar, ban pynsangeh ïa ka PSB, ban sangeh aiwai ïa ki kam ba thung pura bad ban sangeh ka aikam bym khuid ha ki bank.
