Jowai, Lber 18
Ka National People’s Party (NPP) Jaiñtia Hills, ka la pynpaw ïa ka jingsngewnguh bad ai khublei kyrpang ïa ka Sorkar MDA-II kaba la lamkhmat da u Myntri Rangbah Conrad K Sangma ban sdang noh ïa ka rukom tih dewïong da ka stad saïan ne ka scientific mining ban pyntreikam nyngkong eh ha ka jylla ha Saryngkham-A’ Coal Mine, Byndihati, East Jaiñtia Hills District.
Ïa kane ka kam tih dewïong thymmai la plie paidbah da u Myntri Rangbah ka Jylla, Conrad K Sangma ha ka 17 tarik Lber lyngba ka video conferencing.
Haba kren sha ki lad pathai khubor, u MLA ka Jowai bad State President ka NPYF Ma Wailadmiki Shylla u la ong naduh ba la khang ïa ka jingtih dewïong ha u snem 2014, ka la ktah bha ïa ka ïoh ka kot bad ka lad kamai jakpoh jong ki nongshong shnong ka rilum Jaiñtia kiba shaniah ha ka kam dewïong.
U la ong ruh ba ka jingtrei shitom jong ka Sorkar MDA ha u 2019, la lah ban weng ïa ka jingkhang tih dewïong thliew khnai bad na ka liang ka ïingbishar ba ha khlieh duh ka Supreme Court ka la bthah ban sdang ka jingtih da ka stad saïan.
U MLA u la ai khublei ruh ïa ka Ministry of Coal kaba la ai laisen ïa ki lai tylli ki Mining Plan hapoh ka jylla.
