Nongpoh, Lber 18
U Deputy Commissioner (DC) jong ka Ri Bhoi District, Abhilash Baranwal haba kren sha ki lad pathai khubor ha ka Sngi Ba-ar, u la ïathuh bad pynbna ba la pynjari ïa ka hukum lyngba ka Section 163 jong ka Bharatiya Nyaya Sanhita (BNS) ban pyrkhing bad khanglad halor ka jingthang dusmon ïa ki khlaw ki btap kiba hap hapoh ka District.
Utei u heh ka District u la pynpaw ba ka jingthang kulmar ïa ki khlaw ki btap, khamtam kum ha kane ka por jong ka aïom tyrkhong bad jur lyer, ka ktah shikatdei ïa ka mariang, ki mrad ki mreng, ka jingim briew bad ruh ïa ka jingkhuid jong ka lyer.
Ban pyntreikam ïa kane ka hukum, la bthah ïa ka ophis jong u Divisional Forest Officer, Social Forestry and ka Soil & Water Conservation ban pynlong ïa ka jingpeitngor kaba jur bad kyntu ruh ïa kine ki tnat treikam Sorkar ba kin don ïa ka jingïatreilang kaba ïajan ban pyntreikam pura ïa kane ka hukum.
“Ngi kyrpad ïa baroh ki Rangbah Shnong ba kin shimkhia ïa kane ka mat bad ban ai ïa ka jingïatreilang ryngkat bad ki bor pynïaid District. Kino-kino kiba donkti ban thang dusmon ïa ki khlaw ki btap dei ban wad ïa ki bad pyntip sha ki bor ba dei khmih bad ki bor pulit,” la ong u Abhilash Baranwal.
Shuh shuh, u Abhilash Baranwal, u la ban jur ruh ba dei tang lyngba ka jingshimkhia lang jong ki nongïalam shnong, ki tnat treikam Sorkar kiba khmih ïa kane ka bynta, ba yn lah ban teh lakam ïa ka jingthang dusmon ïa ki khlaw ki btap kum shi bynta ban ïada ïa ka jingjot jong ka mariang, ki mrad ki mreng bad ruh ïa ka jingim briew.
