Shillong, Lber 18
Ka Sorkar Jylla ka la bthah ïa ka Meghalaya State Pollution Control Board (MSPCB) ban ïaid shakhmat bad ka jingkhmih bniah bad jingjurip ïa baroh ki shnat karkhana kiba don ha ka thaiñ Byrnihat.
Kum ban shu kdew hangne, ka Byrnihat kaba don ha khappud ka Jylla Assam bad Megha-laya ka la ïoh ïa ka nam ym shuh tang ha ka ri India, hynrei ka la wan ha ka kyrdan banyngkong eh napdeng ki sor ba jaboh tam ka lyer ha ka pyrthei baroh kawei ha u snem 2024.
Ïa kane ka kaiphod la pynmih da ka ‘IQAir’, ka kompani na ka ri Switzerland kaba ju khmih ïa ka jingkhuid bad jaboh jong ka lyer ha kylleng ki ri ka pyrthei.
“Katkum ki jingbthah ba la pynmih da u Myntri Rangbah ka Jylla ha ka jingshimkhia ba dang shen bad ki heh ophisar ka tnad Forest & Environment la bthah ïa ka MSPCB ban leh ïa ka jingkhmih bniah bad jingjurip ïa baroh ki shnat karkhana ha ka thaiñ Byrnihat kiba hap ha ka liang jong ka Meghalaya,” ong ka kyrwoh na u Commissioner & Secretary ka tnad Forest & Environment.
Ka kyrwoh ka ong ruh ba MSPCB ka hap ban pyndep ïa kane ka jingkhmih bniah hapoh shi taïew bad aiti ruh ïa ka kaiphod sha ka tnad haba ïadei bad kane ka bynta.
“Hashuwa, u Myntri Rangbah ka Jylla u la dep ai ka jingkren kaba bniah ha ka Dorbar Mang Tyngka jong ka Ïingdorbar ha kaba ïadei bad ki khubor ki bym sngewtynnad ha ka pyrthei bad ha ka ri baroh kawei bad u la kyntu ïa ka jingïatreilang hapdeng ka Assam bad ka Meghalaya,” ong ka kyrwoh.
Na ka liang u Myntri Rangbah, u la phah ruh ïa ka shithi ‘DO’ sha u Myntri Rangbah ka Assam na bynta ka jingïatreilang naba bun na ki karkhana kiba pynjaboh mariang bad kiba don ha ka kyrdan ‘Red Category’ ki dei kiba don sha ka liang ka Assam jong ka Byrnihat.
Haba kdew ba ka Assam Pollution Control Board ka la dep ban sdang ïa ki kam bad ki sienjam na ka bynta ban khmih bniah bad jurip ïa ki shnat karkhana jong ka, une u heh ophisar u la ong, “Ha kajuh ka por, ka Sorkar Jylla ka la sdang ruh ïa ki lad ki lynti kiba pyrkhing ban peitngor bad khmih bniah ïa ka jingjaboh ha ka liang jong ngi.”
