Shillong, Lber 18
U MLA ka Bharatiya Janata Party (BJP) uba dei ruh Myntri ka Sorkar Jylla, Bah Alexander Laloo Hek u la ong ba ka jingwanrah ïa ka lynti rel sha kane ka Jylla ka shong ha ka jingmon jong ki paidbah.
Haba kren bad ki lad pathai khubor ha ka Sngi Ba-ar, u la ong ba ka shong beit ha ka mon jong ki paidbah la ki kwah ne kim kwah ïa ka lynti rel.
“Ka dei beit ka mon jong ki paidbah, lada ki paidbah ki kwah lynti rel ka lynti rel ka dei ban wan bad lada ki paidbah kim kwah ban don ïa ka lynti rel ruh ka dei beit ha ka mon jong ki paidbah”, la ong u Bah Hek.
Ka jingthmu ban wanrah ïa ka lynti rel ha ka Jylla ka la pulom noh hadien ka jingpyrshah jong kiba bun ki sengbhalang kiba don ha ka Jylla, haduh ba la pynlong ïa ka Sorkar Pdeng ban pan noh ïa ka pisa kaba la dep ban ai sha ka Jylla na ka bynta ban thied jaka ban pynïaid ïa ka lynti rel na Byrnihat shaduh Shillong, kaba long palat T.200 klur.
Ki sengbhalang ki la ïeng pyrshah ïa ka lynti rel halor ka nongrim ba ka Sorkar ka dei ban wanrah shwa ïa ki lad jingïada na ka jingwan ruh ki briew na shabar ka Jylla, da kaba pyntreikam ïa ka Inner Line Permit (ILP) bad hadien kata yn sa ïakren ïa ka lynti rel.
Haba kylli, u Bah Hek u la ong ba ki kam pynroi ba ka Sorkar Pdeng ka la wanrah sha kane ka Jylla ka dei na ka bynta ki paidbah ym na ka bynta ka seng.
“Ngi kwah ban ïohi tang ïa ka jingïohnong jingmyntoi ki paidbah ka Jylla Meghalaya hi”, la ong u Nongïalam ka BJP.
Lah ban pynpaw hangne ba ka jingïatai halor ka mat wanrah lynti rel ka la khluit bha ruh ha ka Dorbar Mang Tyngka jong ka Ïingdorbar Thaw Aiñ ka Jylla kaba dang shu kut shen, hadien ba la mih ka jingpynsngew ba ki paidbah kin rai halor ka lynti rel ha Jaiñtia Hills.
