Shillong, Lber 18
Sa uwei u khynnah napoh ka Jylla uba don hapdeng ka jingsumar hadien ba u la bam ïa ka jingbam kaba la suba long bih, u la khlad noh ha ka miet Lah Sngi U Blei.
Ka jingdon jong ki khynnah napoh ka Jylla kiba la khlad noh namar katei ka jingjia suba ïoh bih na ka bam kaba la jia ha Mandya distrik, Karnataka, ka la kiew sha ka 2 ngut.
Une uba khlad u dei uba la kham shitom jur ha kine ki khyndiat sngi bad la pynkit noh ïa u sha ka jaka sumar ba kham kyrpang bad ba bit ba biang.
Ka kyrwoh na u Secretary ka tnad pule-puthi ka Sorkar Jylla, ka ong ba baroh 22 ngut kiwei pat ki khynnah pule napoh ka Jylla ki la kham biang bad la peit bniah ïa ki.
Ha kajuh ka por, ka kynhun napoh ka Jylla ba kynthup ïa ki ophisar ka tnad pule-puthi ka la poi ha ka jaka jong ka jingjia bad khmih bniah halor ka jinglong-jingman.
Ka kynhun ka la ïakynduh ïa u District Magistrate ka Mandya bad leit jngoh ruh ïa ka ‘hospital’ ha kaba ki khynnah pule (kiba na ka Jylla) ki dang shah sumar.
Nalor kane, ka kynhun ka la leit ban jngoh ïa ka skul (Residential School) ha kaba katei ka jingjia ka la jia bad ïakynduh ruh ïa baroh kito kiba don ka jingsngewkhia halor katei ka jingjia. Ka kynhun kan sa aiti ruh ïa ka kaiphod sha ka tnad pule-puthi haba ïadei bad kane ka jingjia.
Na ka liang u Commissioner & Secretary ka tnad kam pohïing ka Jylla, Bah Cyril V. Diengdoh u la wan poi ha katei ka jaka ryngkat ka jingsynran lang ki bor distrik bad ki pulit.
U District Magistrate, Dr. Kumar, u la pynsngew ha u Bah Diengdoh ba ka jingtohkit ki pulit ka la ïaid shaid-shaid bad kumba ka long mynta, 3 ngut ki briew ki la shah kem ba kynthup ïa u trai jong ka skul bad ‘Warden’ jong ka ‘Hostel’.
Shuh shuh ki heh ophisar ka tnad ka koit ka khiah jong ka ‘Hospital’ kiba la don lang ha kane ka sngi ki la batai ha u halor ka jinglong-jingman jong ki khynnah pule napoh ka Jylla.
