Nongpoh, Lber 18
Ha kawei ka jingjia ha ka Sngi Ba-ar, uwei u diengbah u la khyllem jraiñ hapdeng jong ka surokbah Umling-Patharkhmah kaba dang hap ha ki bynta jong ka shnong New Tasku, Ri Bhoi District.
Katkum ka khubor ba la ïoh lum, la ïathuh ba kane ka jingkhyllem u diengbah ka la jia ha ka por kumba 11 baje eiei mynstep hadien ka jingjur kynsan jong ka lyer kaba la pynlong ïa utei u diengbah ban hap beit hapdeng ka surok bad wanrah ïa ka dheng kali kaba la neh kumba katto- katne por bad dei lyngba ka jingïarap jong ki nongshong shnong ban ot ïa utei u diengbah sa lah ban pyllait noh ïa ka jingsahkut jong ki kali.
La ïoh jingtip ruh ba ha kane ka jingjia, ym shym la don satia kano-kano ka jingmynsaw ïa ki briew kiba ïaid ba ïeng lyngba katei ka surok, hynrei tang ka jinghap jong ki sainar bording ilektrik kiba la shah ban na ka jingkhyllem jong utei u diengbah.
