Shillong, Lber 18
Ïa ka metïap jong uwei u rangbah briew uba la jah naduh ka 9 tarik mynta u bnai, la lap najan jong kawei ka pung kaba don ha ka shnong Mootha Mynsngat ha West Jaiñtia Hills.
Katkum ka khubor na ki pulit la ong ba u Bah Minot Pale u la ai ka jingujor ba ha ka 16 tarik mynta u bnai, la lap ïa ka metïap jong u hynmen jong u, uba la tip kyrteng kum u Bah Chawas Pale (72 snem) najan kawei ka pung kaba dei jong u Bah Elias Muksor kaba don ha shnong Mootha Mynsngat, kaba dei ruh ka jaka kaba u trei.
Shuh shuh, katkum ka khubor la ong ba une briew uba la khlad, u dei uba la jah na ka jaka trei ka jong u, kata naduh ka 9 tarik mynta u bnai. Ha kaba ïadei bad kane ka jingjia na ka liang jong ki pulit ki la kem noh ïa uwei u briew ba la tip kyrteng kum u Seinlangki Tariang (34 snem).
