Shillong, Lber 18
U Myntri Rangbah ka Jylla, Conrad K. Sangma ha ka Sngi Ba-ar u la pynbna ba ka Sorkar kan sa ai ka jingïarap pisa kaba mar T.3 lak sha ki bahaïing bahasem jong kito ki khynnah kiba la khlad noh namar ka jingjia suba ïoh bih na ka bam ha Karnataka.
Ha ka rynsan lad pathai ‘X’, u Sangma u la ong, “Sngewsih ban ïohsngew halor ka jingkhlad noh sa uwei u khynnah napoh Meghalaya ha Karnataka. Ka jingsngewlem na ka liang jong nga sha ki bahaïing bahasem.”
U la ong ruh ba ka Sorkar kan sa kner ïa ka jingïarap pisa kaba mar T.3 lak sha ki bahaïing bahasem jong kito kiba la khlad noh bad kan shim ruh ka jingkitkhlieh halor ka jinglut-jingsep jong baroh kito ki khynnah kiba dang don hapdeng ka jingsumar.
Ha kajuh ka por, u la ong ba ka kynhun napoh ka Jylla ka don ha Karnataka ban synran ïa ki bahaïing bahasem ha kum kane ka por kaba eh.
“Ngi ïaleh katba lah ban wan ïalam biang noh ïa ki khynnah sha la ïing,” ong u Myntri Rangbah.
