Shillong, Lber 18
U samla Rangkitbok C Dohkrut uba dei uwei napdeng ki samla khynnah na ka Jylla bad uba dei u Myllung bad u Nongthoh Kot ha ka Ktien Khasi, uba la pynmih ïa ka thup poitri kaba nyngkong jong u ha u snem 2021 kaba la ai kyrteng kum ka “Ka Maïa Jong Ka Por: Ka Thup Poitri Khasi Ha Ka Laitlan, Haiku Bad Tanka”.
U samla Rangkitbok u dei uwei na ki samla uba la shah khot ha ka Sahitya Akademi, New Delhi ban ïashimbynta ha ka-The Tasty Sound: Poetry Readings by North East and Southern Poets.
U Rangkitbok u la pule ïa ka poitri jong u “Ki Tamasa Ki Cherry” (Cherry blossom Festi-val), ka poitri kaba kren halor ka jingitynnat jong ka aiom ha kaba ki syntiew ‘cherry’ ki phuh ha ka nongbah Shillong, ka la sawa ha ka kamra (hall) jingïalang ha Delhi ha ryngkat ki nongsngap kiba long ki myllung bad ki nongthoh kot na kylleng ka Ri India.
U nongthoh jong kane ka poitri, Rangkitbok, uba long u myllung jong kane ka Jylla u la ïathuh ba katno u dap da ka jingsngewkmen bad jingsngewburom ba u la ïoh ïa kane ka lad ban ïeng hangtei bad ban pule ïa ki poitri jong u bad ban ai jingkren ruh khyndiat halor ka jingriewspah ka ktien Khasi bad da kumne u la leh ïa ka bynta ban kyntiew ïa la ka ktien bad ïa ka Ri bad Jaidbynriew hi baroh kawei ha ka 11 tarik u Lber, 2025 ha ka jingïalang kaba la ai kyrteng ‘Tasty Sound: Poetry Readings by Poetry North East and Southern Poets ha ka Festival of Letters 2025 ha Rabindra Bhavan Complex, 35 Ferozeshah Road, New Delhi.
Kum shibynta jong ka Festival of letters 2025 jong ka Sahitya Akademi kaba la pynlong hapdeng ka 7 haduh ka 12 tarik u Lber ha Rabindra Bhavan Complex, Delhi bad la buh kum ka tamasa thoh kot kaba heh tam ha Asia (Asia Largest Literature Festival).
Ïa kane ka jingïalang la pynlong da ka Sahitya Akademi, kane ka jingïalang kaba la pynïaid da u N Kiran Kumar Singh, ka la wanrah lang ïa ka kynhun ba itynnat jong ki myllung kiba mihkhmat ïa ki jait ktien bad ki kolshor bapher bapher jong ka Ri India.
Kawei na ki jingkren ba kongsan jong kane ka jingïalang ka long ba u samla Rangkitbok, uba la pule ïa ka poitri Khasi kaba donbor bad pynktik mynsiem jong u “Ki Tamasa Ki Cherry” ryngkat bad ka jingpynkylla sha ka ktien phareng. Ka jingpule jong u, ka la ai jingmut shaphang ka kolshor bad ka jingriewspah jong ka poitri jong ka thaiñ shatei lam-mihngi.
Nalor kata, u samla Rangkitbok u la ïasam katto-katne ki bynta na ka jingpule poitri bapher-bapher jong u. Kine ki kynthup ïa ki Haikus ha ka Ktien Khasi bad Ktien Phareng, ka rukom thoh poitri ki nong Japan , bad kumjuh ruh ki poitri phareng jong u kiba la jer Kyrteng “I gather” bad la pule ruh ha ka Khasi kum “Nga Lum”, “The Maniac Called Drugs”, and “Today I Stand”, kawei pa kawei na ki ka wad bniah ïa ki phang ba jylliew jong ka jinglong shimet bad ka imlang sahlang.
Ha kane ka jingïalang la pynlong ïa ki jingpule poitri ha ki ktien bapher-bapher, da kaba pynpaw ïa ki riti ki dustur kiba riewspah jong ka thoh ka tar jong ka ri India hi baroh kawei. Kiwei pat ki myllung kiba la pule ïa ki poitri jong ki, ki kynthup ïa u Siddhartha Sankar Kalita (Assamese), u TKU Santhosh Kumar (Malayalam), u Thiru Prasad Nepal (Nepali), ka Mandarapu Hymavathi (Telugu) bad ka Akshara Raj Perla (Tulu).
Ka jingïalang ka wanrah ïa ka jingïatylli kaba itynnat jong ki rukom thoh poitri tynrai bad kiba mynta, kaba la pynsawa ïa ki nongsngap bapher bapher kiba la ïawan lang ha kane ka tamasa. Ka Festival of Letters 2025 ka dang ïai bteng ban long ka rynsan kaban pyni ïa ka jingïar jong ka thoh ka tar; bad ka jingkren bad jingpule poitri jong u samla Rangkitbok C Dohkrut ka la wanrah ïa ka jingriewspah jong ki ktien bad ki kolshor jong ka ri India.
