Shillong, Jymmang 20
U Acting Chief ka Hima Sohra u Bah Mynjurlang Majaw ha ryngkat ki Myntri bad ki Executive Member jong ka Dorbar Hima Sohra ha ka sngi Balang u la ïakynduh ïa u CEM ka KHADC bad u EM ka Elaka ban pan jingshai halor ka jingpynslem ban ai sanad ïa u Syiem ba la jied da ka Dorbar Hima Sohra.
U Bah Winston Tony Lyngdoh CEM haba kren sha ki nongthoh khubor ha ryngkat ka jingdonlang u EM ka Elaka u Bah Denzil R Chen u la ong ba ka Council ka dang ap beit ïa u Acting Chief ba un pyndep ïa ka kamram kaba la phah na ka ophis ba un pynbiang ïa ki ‘Elector’ na ka bynta ban ïoh ban pynlong ïa ka jingjied Syiem hapoh ka Hima Sohra, ha kaba u CEM u la pynpaw ba u Acting Chief u la pyntikna ba un pynsted ïa ka kam.
U CEM u la ong ba ynda la ïoh ïa ki ‘Elector’ yn sa ïaid shakhmat ïa kane ka kam bad ong ba ka Council kam shym la buh por eiei, hynrei kaba la shu ai jingmut ba dei ban buh por bad ki kur ki Myntri, namar kane ka kam ka kham jrong ha kaba ki hap ban leit sha ki kur ban ïoh ïa ka jingai jingmut jong ki.
U CEM u la ong ba ka rai jong ka Council haba ïadei ka shuki Syiem, kan pynlong beit da ka ilekshon namar ba la don sa uwei u Rangbah uba la mih shakhmat ban pynithuh ïalade ba u dei na ka kpoh Syiem bad u kwah ban ïakhun ïa ka khet long Syiem.
