Shillong, Jymmang 20
Ki Khlieh nongsynshar Shnong kiba hap hapoh ka Hima Sohra ha ka sngi Balang ki la pynshai paidbah ba ki don haduh 32 ngut ki Sordar Shnong, 4 ngut ki Secretary shnong ha ryngkat ki paidbah, kiba la wan ban ïashim bynta ha ka jingïakhih ba la long ha ka 7 tarik Jymmang 2026 ha phyllaw ka KHADC ban dawa Syrnod Syiem ba pura ka Hima Sohra bad kyntait ïa ka jingkynnoh jong ki katto katne ki Sordar shnong kiba hap hapoh u pud u sam jong ka Hima Sohra.
U Bah Edmund Khongsya haba kren sha ki nongthoh khubor u la ong ba ka jingdon ki katto katne ki bym kwah ban ai ka jingïatreilang ha ka ban dawa sanad ïa u Pa’iem Marremdor Syiem u ba ka Dorbar Hima ka la dep ban jied, ka lah ban dei ba kim sngewtynnad ïa u Pa’iem ba un long kum u Syiem ba pura, kumjuh ba kim kwah ïa ka shongsuk shongsaiñ hapoh jong ka Hima, u la kynnoh.
U Bah Edmund u la kyntu bad jur ïa kitei ki katto katne ngut ki Sordar Shnong ba kin ai ka jingïatreilang ha ka ban dawa bad ban pynbor ïa ka District Council ban ai Sanad noh kloi ïa u Syiem ba ka Dorbar Hima ka la dep ban mynjur. U Bah Kyntiew Khongshei Secretary Raid Mawshuit haba ïadei ba don ka jingkynnoh ba ka jingthung Syiem ïa u Marremdor Syiem kam dei kaba la ïaid katkum ka riti dustur, u la pynshai ba kane ka dei kaba bakla namar hadien ka jingkhlad u Pa’iem Freeman Sing Syiem ka Raid Mawshuit ka la leit ban ïakynduh ïa ka Syiemsad ba ka dei ïa ki ban sei Syiem namar ka jingkhlad noh u Syiem ka Hima.
“Ka kur ka la dep ban pynbeit ha ryngkat ka jingmynjur ki Myntri bad la phah jingtip sha ka raid Mawshuit ba kin pynkiew khet noh ïa u Marremdor Syiem uba long u Syiem Khynnah sha u Syiem ba pura jong ka Hima, hynrei haba la ap katto katne por ban pynskhem ïa u, kam shym la don kano-kano ka jingujor na kano-kano ka liang bad dei na kata ka nongrim ba la ïoh ban pynskhem kumjuh ban pyndep ha ka jingthang ïa ka met ba sah jong u Syiem ba la khlad” la ong u Bah Kyntiew.
U la kyntu ïa ka District Council ba kam dei ban leh khun jakai ïa kaei ba ka ka Dobar Hima ka la dep ban pyndep katkum ka niam ka rukom bad kaba la leh ruh katkum ki riti ki dustur, hynrei ba kan leh la ka jong ka kamram kaba long katkum ka nongrim ka District Council ba dei ban pynneh pynsah ïa ki riti dustur bad ban pynkloi noh ka jingai sanad ïa u Syiem ba ka Hima ka la dep ban jied.
