Shillong, Jymmang 20
Ka kynhun jong ki sengbhalang ba kynthup ka Jaiñtia National Council, ka Jaiñtia Students Union lem bad ki paidbah nongrep kiba napoh elaka Nongkhlieh ha ka sngi Balang ki la leit ban tur sha ka shlem treikam jong u Deputy Commissioner ka East Jaiñtia Hills ban pynpaw ïa ka jingpyrshah bad dawa ban pyndam ïa ka ‘public hearing’ halor ka projek Shree Cement Company ha Lum Syrman.
Ha kane ka sngi, la sakhi ba ki nongïalam bad dkhot jong ki sengbhalang ryngkat u paidbah kiba la tur shakhmat, ki la ïakhun tyngeh bad ki pulit kiba la pahara jur da ka jingthmu ban rung sha ophis treikam jong u DC.
Ha kane ka jingleit tur, ki la maham ruh ba lada ai jingbit ïa ka jingtih mawshun ha ka jaka ba 217 hectare, ka jingjot kaba khraw kan wanrah ïa ka mei mariang, ki lyngkha rep kba bad ki krem ki kroh kiba don ïa ki khana pateng hapoh ka thaiñ.
Kila kynnoh ruh ba ka Sorkar kala pyrshang ban pyndonkam da ki buit ban pyntieng pynsmiej bad ïaid lait ïa ki kyndon aiñ kynthup ka Meghalaya Land Transfer Act, haba pynïaid shakhmat ïa kane ka projek.
Kane ka kynhun kaba pyrshah ka la pynmih ka sur kaba la kynnoh ba u Myntri Rangbah ka Jylla, u Conrad Sangma, u Symbud Myntri Rangbah, u Bah Sñiawbhalang Dhar ki donkti lang bad ka Shree Cement company bad ban pyndonkam da ki buit bad bor ïa ka hok jong ki paidbah nongrep.
U President ka JNC Bah Sambormi Lyngdoh u la ong, ha kaba ïadei bad ka jingthmu khlong mawshun ka kompeni Shree Cement na Lum Syrman, kaei kaba paw shynna ka long ba ka la don ka jingshah knieh jubor ïa ki jaka rep jong ki nongshong shnong bad kane ka la pynbitar ym tang ïa ki paid nongrep hynrei ka la pynbitar ruh wat ïa ka seng.
Ha kane ka sngi, ka la mih ruh ka jingbyrngem ban khang tala ïa ka ophis u DC bad ruh ban khang lynti ïa u DC bad ki heh Sorkar ha ka sngi ba pynlong ïa ka ‘public hearing’.
