Shillong, Jymmang 20
Ki pulit East Garo Hills ki la kem noh ïa uwei u briew halor ka jingkynnoh ba u la buh ïa ki jingthoh bad ki dur khih (video) khlem akor kaba pynlong sohpdung ïa ki kynthei ha ki rynsan ‘social media’.
Utei u nongshah kynnoh, u Newbard M Sangma ba khot sin u Betuel na Aochak Jangkigre, Williamnagar, u la shah kem hadien ba ki bor ka aiñ ki la lap ba u pynïaid ïa kawei ka Facebook Account ha kaba u la thep (Upload) ïa ki jingthoh bad ki video ba khlem akor bad kiba kren beiñ ïa ki kynthei da ki ktien kiba sniew.
Ki pulit ka Williamnagar ki la register case pyrshah ïa u nongshah kynnoh hapoh ki kyndon ba kynthup Sections 75(IV)(3) bad 79 jong ka Bharatiya Nyaya Sanhita (BNS), pule lang Section 67 jong ka Information Technology Act, 2000.
U Superintendent of Police u Bah SA Rynjah u la ong ba ka jingtohkit ka la sdang hadien ba ki pulit ki la ïoh jingtip halor ka jingtreikam u nongshah kynnoh hapoh ka Facebook.
“Ïa ka jingtohkit la sdang hadien ba ki bor pynïaid ki la ïoh jingtip ba u ju mlien ban buh (Upload) ïa ki jingthoh bad ki video kiba khlem akor ka Facebook account bad ka YouTube channel jong u, kiba lah ban ïohi da ki paidbah,” u la ong.
Ki pulit ki la ïathuh ba la bishar bniah ïa ki jingthoh bad ki video bad la lap ba ki long kiba pynkheiñ ïa ka aiñ. “Ki jingthoh bad video ha Facebook ba dang shen la lap ba ki long kiba sniew bad kiba khlem akor bad kiba lah ban shah pynshitom hapoh ki kyndon Sections 75(IV)(3) bad 79 BNS bad R/W Section 67 jong ka IT Act, 2000.”
Ha ka jingai jingmut sha ki paidbah, ki pulit ka East Garo Hills ki la kdew ba “hapoh ka aiñ Information Technology Act, ka jingpynrung, jingpynpoi, ne jingpynmih ïa ki jingthoh ne video khlem akor ka dei ka kam runar”.
U SP u la kyntu ïa kiba shah ktah ba kin wan shakhmat. “Ki briew kiba shah ktah ki lah ban ujor ïa kum kine ki kam sha ki pulit. Lah ruh ban pyndonkam ïa ka National Cybercrime Reporting Portal (NCRP) ban ujor namar ba ka long kum ka rynsan ba thikna na ka bynta ban ujor da kaba shngaiñ ïa ki jingjia ba sniew kiba jia ha ka rynsan ‘social media’ kum ki kam haba ïadei bad child sexual abuse material (CSAM) bad cyber-blackmail.”
