Shillong, Lber 18
Ka jingjur jong ki kam tuh kam thiem ka dang bteng na kawei ka sngi sha kawei pat, haduh ba ka la wanrah ka jingbym shngaiñ shuh ha ki trai ïing ne ki trai kali ieh ïing ne pynïeng kali.
Katkum ka khubor kaba la ïoh na ki pulit la ong ba u Bah Robertson Kharnaior u la ujor ba ki runar bym lah ban ithuh ki la tuh ïa ka kali Tata Sumo ka jong u kaba don ïa u registration number ML05-J-2826 na ka thaiñ Mawïong Umjapung, Shillong.
Ha kawei pat ka khubor, ka Kalpana Mizar ka la ujor sha ki pulit ba ha ka 14 tarik mynta u bnai, kata hapdeng ka por 2 baje mynsngi haduh 6 baje janmiet, ki runar bym lah ban ithuh ki la prong tuh hapoh ka ïing ka jong ka, kaba don ha Arbuthnoth Road, Demseiñïong, Shillong bad ha kaba ki la ïoh ban rong tuh ar tylli ki kynjri ksiar, kawei ka payal rupa, ar tylli ki shoh shkor kiba shongdor haduh kumba T.67 hajar bad ka pisa kaba long T.5 hajar.
Ha kawei pat ka khubor, u Soreingam u la ai ka jingujor ba ha ka por mynsngi jong ka 13 tarik mynta u bnai, ki runar bym lah ban ithuh ki la prong tuh hapoh ka ïing ka jong u, kaba don ha Rynjah Lumshngaiñ, Shillong bad ban rah tuh kawei ka Laptop ryngkat bad u charger, kaba shongdor kumba T.55,800.
Katba ha kawei pat ka khubor, ka Kong Dilomera Kharwar ka la ujor sha ki pulit ba hapdeng ka miet jong ka 12 bad 13 tarik mynta u bnai, ki runar bym lah ban ithuh, ki la tuh haduh phra tylli ki masi kiba dei trai da ka hynmen jong ka na ka shnong Shaid Shaid Umoit ha South West Khasi Hills.
