Shillong, Lber 18
U MLA ka Bharatiya Janata Party (BJP) na Pynthorumkhrah uba dei ruh u Myntri hapoh ka Sorkar MDA-II, Bah Alexander Laloo Hek u la ong ba ka jingkylliang ïa ka shuki Myntri hapdeng jong u bad u MLA ka BJP na South Shillong, Bah Sanbor Shullai, ka shong ha ka rai jong ki nongïalam ka seng.
“Phi lah ban kylli na u State President lane na ka seng BJP, ym na nga. Ngan ym lah ban ïathuh eiei ïa phi ha kaba ïadei bad kane ka kam, ka dei beit ka rai jong ka seng, kaei ba ka seng ka rai ngan hap ban kohnguh ïa kata”, la ong u Bah Hek haba kylli ki nongthoh khubor ha ka Sngi Ba-ar.
Lah ban pynkynmaw ba ka BJP naduh kaba sdang ban thaw ïa ka Sorkar MDA-II, ka la phah da ka jingthoh sha u National President jong ka National People’s Party (NPP) uba dei u Myntri Rangbah ka Jylla, Conrad K. Sangma ban bujli ïa ka shuki Myntri mar ar snem shiteng hapdeng u Bah Alexander Laloo Hek bad u Bah Sanbor Shullai kiba dei ar ngut ki MLA jong ka BJP.
Ka BJP ka dei ka seng saiñpyrthei kaba la ïatreilang bad ka NPP ha Delhi bad ha kane ka Jylla naduh u snem 2018 bad mynta ruh ka la ai jingkyrshan ïa ka NPP kaba la ïalam ïa ka Sorkar Meghalaya Democratic Alliance (MDA-II).
Ki Nongïalam ka BJP ryngkat bad ar ngut ki MLA ki la mynjur ban ailad shwa ïa u Bah AL Hek ban long kum Myntri hapoh ka Sorkar na ka bynta ar snem shiteng ka ban kut ha ka 7 tarik, Nailar, 2025 bad hadien kata kan dei pat sa ka pali jong u Bah Sanbor ban don hapoh ka Kynhun Myntri na ka bynta ki snem kiba dang sah, bad la bthah ruh ïa baroh ar ngut ki MLA ba kin burom ïa ka rai jong ka seng bad ban ïatreilang na ka bynta ka jingmyntoi bad ka jingïabiang lang.
Lah ban pynpaw ruh hangne ba ha samoi treikam jong ka Sorkar MDA-I 2018-23, ar ngut ki MLA ka BJP ki la ïasam ïa ka shuki Myntri mar ar snem shiteng, hynrei ha katei ka por kam shym la don satia ka jingïateh ne mynjur lypa. Pynban ha u snem 2023 haba la thaw ïa ka Sorkar MDA-II, ka la don lypa ka jingïapynbeit ban ïasam mar ar snem shiteng ïa ka shuki Myntri hapdeng kitei ki MLA ka BJP.
