Nongpoh, Lber 19
Ha kawei ka jingjia kaba sngew shyrkhei ha ka sngi Balang, kawei ka longkmie ka la mynsaw jur hadien ka jingshah thombor ha u runar uba la pyndonkam da u bilor beer ba la pait bad u maw ban tied ïa ka ha ka por katba ka dang thmu ban leit trei sha ka kad liengsuiñ kaba don ha Umroi.
Katkum ka tyllong khubor ba la ïoh lum na ki pulit, la ïathuh ba kane ka jingjia ka dei ha ka por kumba 8:10 mynstep jong ka 19 tarik u Lber, 2025.
Ïa katei ka longkmie kaba la tip kyrteng kum ka Ellana Lyngdoh Mawphlang, 27 snem ka rta, kaba la mynsaw jur ha katei ka jingjia, la pynkit noh mar-mar sha CHC Bhoirymbong bad hadien pat la pynkynriah noh sha North Eastern Indira Gandhi Regional Institute of Health and Medical Science (NEIGRIHMS) na ka bynta ban pynïoh ïa ka jingsumar kaba paka.
Ki pulit ki la ïathuh ruh ba katei ka longkmie ka dei na ka shnong Madanryting, Shillong bad kaba sah wai ha ka shnong Nongrah, Ri Bhoi District.
Shuh shuh ki bor pulit ki la ïathuh ba ki la ïoh ksai ïa utei u runar uba leh ïa katei ka kam pyntriem ïa katei ka longkmie bad ka jingthwet ban ïoh kem ïa u, ka dang ïaid shakhmat.
Ka khubor na ki pulit ka la ïathuh ba hadien ka jingthwet kaba jur lyngba ka jinglap ksai, ki pulit ki la ïoh ban kem noh ïa u briew uba donkti ban tied da u bilor beer bad maw ïa ka longkmie ha kad liengsuiñ.
Une u briew uba la shah kem u dei uba la tip kyrteng kum u Kyrshanlang Marngar ba dang 21 snem, uba na ka shnong Dongrudwah Nongrah Umroi.
