Shillong, Lber 19
Ka seng kieng atiar Hynñiewtrep National Liberation Council (HNLC) ha ka sien kaba nyngkong ka la shim ïa ka rai ban ïakhun pyrshah hapoh ka Unlawful Activities (Prevention) Tribunal, ïa ka jingpynjlan kheiñ be-aiñ jong ka Sorkar Pdeng sa 5 snem.
Na ka bynta kane ka kam, ka HNLC ha ka 6 tarik mynta u Lber ka la thung ïa u Bah Fernando Shangpliang kum u nongïasaid jong ka seng.
Haba kren sha ki lad pathai khubor ha ka sngi Balang, u Bah Shang-pliang u la ïathuh ba ïa u la thung ban long u nongïasaid da u Chairman bad General Secretary ka HNLC, Bah Bobby Mar-weiñ bad Bah Saiñkupar Nongtraw, ha kaba u la pyntip ruh ba ka jingbishar jong ka ‘Tribunal’ halor kane ka kam kan long ha ka 22 tarik mynta u Lber ha Shillong.
Ha kawei ka liang u nongmihkhmat ïa ka HNLC uba dei ruh u President ka Hynñiew-trep National Youth Front (HNYF), Bah Sadon K. Blah u la ong ba ka HNLC hadien ba la pulom noh ka jingïakren ïasuk ha ka synshar-khadar (political), ka seng ka la shim ïa ka sienjam ban ïakhun noh da ka lynti jong ka aiñ namar ka kwah ban don ka jingïakren ïasuk bad ka Sorkar.
U la ong ba ka HNLC ka shim khia ïa ka jingïasuk da ka lynti jong ka synshar-khadar, hynrei ha ka por ba la sdang ka jingïakren ïasuk, ka Sorkar Pdeng bad ka Sorkar Jylla ki la pynpaw jingeh ha kaba ïadei bad ka jingdawa ka HNLC ban weng noh ïa ka jingkheiñ be-aiñ.
“Ka daw ba ka HNLC ka kwah ban ïakhun ïa kane ka kam da ka lynti jong ka aiñ, ka dei namar ha ka por ba sdang ïa ka jingïakren ïasuk bad ki nongïalam ka HNLC ha Shillong, ngi la buh hakhmat ban dawa na ka Sorkar ba ka dei ban weng noh ïa ka jingkheiñ be-aiñ, hynrei ka Sorkar Pdeng bad ka Sorkar Jylla kim shym la kren shai ba kin weng noh ïa ka jingkheiñ be-aiñ ïa ka HNLC”, u la ong.
U Bah Sadon u la pynpaw ka jingkyrmen ba ka ïingbishar, ka Sorkar Jylla bad ka Sorkar Pdeng kin sngewthuh ba ka HNLC ka dang shim khia bha ban wan shakhmat na ka bynta ka jingïakren ïasuk.
Ka Ministry of Home Affairs jong ka Sorkar Pdeng ka la pynmih ïa ka jingpynbna ban pynjlan ka jingkheiñ be-aiñ ïa ka seng HNLC ha ka 14 tarik Naiwieng 2024.
Lah ban pynkynmaw ba ha sien shong jong ka ‘Tribunal’ kaba la long ha ka 18 tarik Rymphang, ka Sorkar Jylla ka la aiti ïa ki kot ki sla ba pyni ïa ki kam jong ka HNLC. Ha katei ka sien shong ka ‘Tribunal’ ka la bishar bniah ïa ki mukotduma ba ïadei bad ka HNLC, kynthup ruh ïa ka jingdon haduh 48 tylli ki mukotduma kam runar, ba kynthup ïa ka jingbuh bad pynbthei bom ha ka Jylla, kata na ka 16 tarik Naiwieng 2019 haduh ka 30 tarik Jylliew 2024. Ha kane ka juh ka por la don 3 ngut ki dkhot ka seng kiba la pyndem wait noh bad la kem pat haduh 73 ngut ki dkhot.
Ïa kane ka ‘Tribunal’ la khlieh da u Justice Soumitra Saikia jong ka Guwahati High Court, katba u nongïasaid aiñ ba mihkhmat ïa ka Sorkar India u dei u Subhash Chandra Keyal (Learned Special Counsel Union of India), bad na ka bynta ka Sorkar Jylla yn mihkhmat da ki ophisar pulit ha ka kyrdan IPS bad ki SP jong ki district.
