Nongstoiñ, Lber 19
Ha ka sngi Balang jong ka taïew, ki paid nongshong shnong jong ka shnong Riwiang ha West Khasi Hills ki la bat noh ïa ki 4 tylli trok kit dewïong kiba la wan pynhap mar ha M/s Shree Shakambari Ferro Alloy Private Ltd kaba don ha ka shnong Riwiang.
Ka jingbat jong ki paidbah nongshong shnong ïa kitei ki trok kit dewïong ka dei hadien ka jingbym pat lah jong katei ka karkhana ban ïa pynbeit ryntih bad ka shnong.
Uwei na ki nongpeit katei ka karkhana u la ong ba kitei 4 tylli ki trok ki dei kiba la wanrah ïa u dewïong naduh ka jylla Nagaland, ïa uba la kit ne thep ha ka trok heh naduh ka 13 tarik u Lber 2025 hynrei la pyllait pat ha kitei ki trok rit ha ka shnong Boko bad ki dang shu wan poi ha katei ka sngi ha katei ka karkhana na ki daw ka jingslem ba thut ki kali ha lynti.
“Da lei-lei ngin ym shah ban rung ne mih kiei-kiei kiba na katei ka karkhana katba u trai jong ka karkhana um pat ïakren bniah ban ïa pynbeit ryntih bad ka shnong Riwiang,” ong ki paidbah.
Shuh shuh ha katei ka sngi, ki paidbah ki la phah mih noh mardor ïa kitei ki trok khlem da shah ban pynhap ïa u mar ha katei ka karkhana bad baroh 4 tylli ki trok ki la hap ban mih noh shabar ka karkhana ryngkat u dewïong.
