Shillong, Lber 19
U Nongïalam ka Liang Pyrshah ha KHADC uba dei ruh MDC ka UDP na Sohra, Bah Titosstarwell Chyne, u la ong ba un sa wanrah ïa ka mat ban ïatai ha ka Dorbar mang tyngka jong ka Khasi Hills Autonomous District Council halor ka jingkyrduh kam kyrduh jam ki samla.
U la pyntip ba ka Dorbar Mang Tyngka kan sdang naduh ka 26 tarik Lber 2025 hynrei um tip la ka dei kaba pura ne kaba khyndiat bnai.
U la ïathuh ba ka jingwanrah ïa kane mat ban ïatai halor ka jingkyrduh kam ki samla namar u kwah ban tip la ka Executive Committee ba la ïalam da ka VPP kin leh kumno ban pynmih kam ïa ki samla.
U la ïathuh ba don bun tylli ki jingkylli kaba ki MDC Liang Pyrshah ki la dep buh kaba la ai por haduh 10 tarik mynta u bnai khnang ba ka tnat Legislative kan ïoh ban wanrah ynda la sdang ka Dorbar.
U la ïathuh ba un sa wanrah ruh ïa ka mat ban ïakren halor ka jingshah khang ban t?h maw tih shyiap ki ïakynduh jingeh, namar u kwah ban tip ïa ka EC kaei ba kin leh haba ki paidbah kin ïakynduh. Shuh shuh u la ïathuh ba ka mang tyngka ha KHADC ka poi palat 200 klur lada don ki skhim na ka Sorkar India bad ka bhah ba la ai da ka Sorkar Jylla, hynrei um lah ban tip haduh katno ka Sorkar Jylla kan ai ka bhah namar la ka dang ïoh lum khajna ne em na u mawshun haba um ïaid shuh bad u dewïong.
Kum ban shu kdew ha kane ka ilekshon MDC ki paidbah ki la jied haduh 17 ngut ki MDC na ka VPP kaba synshar marwei ïa ka executive committee ha KHADC bad ki MDC liang pyrshah ki ban shong ki long san ngut na UDP, 4 ngut na NPP, uwei HSPDP bad ar ngut MDC shimet.
Kum ban shu pynkynmaw ha ïingdorbar thawaiñ ka jylla ki MLA ka VPP ki dei kiba buh jingkylli ïa ka Sorkar ba la ïalam da ka NPP bad UDP bad mynta ha KHADC ki MDC ka NPP bad UDP kin sa long kiba buh jingkylli ïa ka executive committee ba la ïalam da ka VPP ha Dorbar KHADC.
