Jowai, Lber 19
Ka Jaiñtia Hills Development Society ryngkat ka jingïatreilang bad ka ophis District Social Welfare Officer West Jaiñtia Hills District ki la pynlong ïa ka jingai jinghikai ba shibnai halor ka kam suhjaiñ ïa kaba la sdang naduh ka 3 tarik u Rymphang bad la pynkut noh ha ka 19 tarik u Lber.
La pynkut ïa ka jingai jinghikai da kaba sam ïa ki syrnot (certificate) sha 20 ngut kiba la ïoh jinghikai ïa kaba la sam da ka District Social Welfare Officer West Jaiñtia Hills ka Kong Y Najiar.
Ïa ka prokram jingai jinghikai la pynlong hapoh ka ‘training centre’ jong ka JHDS kaba don ha Lumbihsyntu Mihmyntdu ha West Jaiñtia Hills district.
Ha shwa ka jingsam syrnot la pynlong ïa ka jingïalang ba la pynïaid da u Program Coordinator ka JHDS Ma Denis Kurkalang ha ka jingïadonlang u Director ka JHDS u Fr Manbha Pakem, u Ma Francis Langlein Field Program Associate ka JHDS bad kiwei de ki nongtrei ka JHDS. Haba ai jingkren, u Fr Manbha Pakem u la ai khublei ïa ka ophis treikam jong ka District Social Welfare kaba la ïarap ban bei tyngka ïa kane ka prokram. U la kyntu bad ai mynsiem ruh ïa ki nongshah hikai ba ki dei ban pyndonkam hok ïa ka jinghikai ba ki ïoh khnang ba kin lah ban kyrshan ïa la ka ïing ka sem namar kane ka kam ka long ka lad kamai jakpoh khamtam ha kum kane ka juk kyrduh kam.
Ka District Social Welfare Officer ka Kong Y Najiar ka la ong ba ka thong jong ka Sorkar ka long ban plie lad ïa ki longkmie bad ki samla bym don kam don jam lyngba ki jingïarap bapher bapher kiba ka Sorkar ka la theh.
Ka la pynshlur ruh ïa ki nongshah hikai ba ki dei ban burom ïa la ka kam ba ki trei khnang ban wanrah ki jingkylla ha ka ïoh ka kot jong ki.
Ha kane ka prokram ai jinghikai la ïashim bynta da ki 20 ngut kynthei kiba kynthup lang ïa ki samla bad ki longkmie bad la ai jinghikai da ka Kong Ïaki Ryngkhlem.
