Nongpoh, Lber 19
Ki pulit ka Ri Bhoi District ki la ïoh ban kem noh ïa lai ngut ki briew halor ka jingdonkti ban pynrung tuh ïa ki nong Bangladesh sha ri India ha ka janmiet jong ka sngi Ba-ar hadien ka jingpynapshrip kaba la pynlong ha Byrnihat Police Outpost.
Katkum ka tyllong khubor na ki pulit, la ïathuh ba hadien ka jingïoh jingtip ba thikna ba ki don ki nong Bangladesh kiba la wan rung beaiñ lyngba ka thaiñ Dawki bad kiba thmu ban leit sha nongbah Guwahati, ki pulit ki la pynlong ka jingpynapshrip ha Byrnihat bad dei ha ka por 4:10 janmiet la ïoh ban bat ïa kawei ka kali kaba don ïa u registration number AS01-FJ-4645.
Na katei ka kali, ki pulit ki la ïoh ban kem noh ïa kawei ka nong Bangladesh kaba la tip kyrteng kum ka Jannati Sheikh, 26 snem ka rta na ka shnong Jasor, Khulna, Bangladesh bad la ïoh ruh ban kurup ïa ka Aadhaar India kaba la shna thok.
Na ka liang ki bor pulit ki la kem ruh ïa u nongñiah jong katei ka kali ïa uba la tip kyrteng kum u Raushan Khan na ka shnong Rangapani, Barpeta, Assam. Ha ka jingtohkit jong ki pulit, kitei ar ngut ki la phla halor ka jingdonkti ban khaïi briew na Bangladesh sha India bad na India sha Bangladesh ban kamai pisa khlem da donkam ïa ki kot ki sla kiba biang.
Halor kane jingjia, na ka liang ki pulit ki la pynrung mukotduma pyrshah ïa kitei ar ngut ha thanat Nongpoh hapoh ki kyndon jong ka BNS bad Foreigners Act 1946 bad ka jingtohkit ban lapdien shuh shuh ïa kiwei de kiba donkti ha kane ka kam beaiñ ka dang ïaid shakhmat.
Shuh shuh, hadien ba la tohkit, ki bor pulit ki la pyntip ruh ba la ïoh ban kem sa ïa uwei u briew ba donkti halor kane kam ïa uba la tip kyrteng kum u Balajied Khongsun, 27 snem ka rta na ka shnong Wahlyngkhat, Pynursla, East Khasi Hills District.
