Shillong, Lber 19
Ka Meghalaya State Commission for Protection of Child Rights (MSCPCR) ka la pan ïa ka kaiphod kaba bniah na ka Karnataka State Commission for Protection of Child Rights (KSCPCR) ban bishar bad shimkhia halor ki jingduna kiba la ïalam sha ki jingpynkheiñ ïa ka hok ban ïoh jingïada na bynta ki khynnah.
Ka Commission lyngba ka kyrwoh na ka Chairperson, ka Agatha K. Sangma ka ong ba ka dap da ka jingsngewsih ban ïohsngew halor ka jingkhlad noh jong 2 ngut ki khynnah pule na ka Jylla – na ka shnong Lyndem kaba hap hapoh Pynursla Sub-Division bad ka shnong Sohparu kaba hap hapoh Nongstoiñ.
“Kano-kano ka jingduh noh ïa ka jingim ka long kaba sngewsih khamtam haba ka kynthup ïa ki khynnah na ka Jylla ha kum kane ka jingjia ba sngewsih, ka bym shym la dei hi ban wan jia ha kaba nyngkong,” ong ka Sangma.
Ha kajuh ka por, ka MSCPCR ka pynrem jur ïa kito kiba donkti ha ka ban pynkheiñ ïa ka hok ban im jong u khynnah bad na ka liang ka Commission ka ïatreilang bad ka KSCPCR ban pyntikna ha ban shim ïa ki lad ki lynti kiba biang pyrshah ïa kito kiba donkti bad ruh ban ïarap ha ka ban ïada ïa ka koit ka khiah bad ka bha ka miat jong 22 ngut ki khynnah pule na Meghalaya kiba la shah ktah lang ha katei ka jingjia.
“Ka Commission ka kitbok-kitrwiang ruh ba ki khynnah pule kin ïoh noh kloi ïa ka jingkoit jingkhiah – kiba dei ka lawei ba phyrnai jong ka Jylla jong ngi khnang ba kin tyngshaiñ bad ïashim bynta ban pynurlong ïa ki kamram kum ki khynnah,” ka la ong.
