Shillong, Lber 19
Ka Myntri ba khmih ïa ka tnat ka Koit ka Khiah hapoh ka Jylla, Kong Ampareen Lyngdoh ka la ong ba ka tnat ka la sdang ban pyntreikam ïa ka skhim CM-Care+ na ka bynta ban kyrshan ïa ki paidbah ban ïoh ïa ki jingsumar haba pang bad shitom, nalor ka skhim Meghalaya Health Insurance Scheme (MHIS) kaba la don lypa.
Haba kren sha ki lad pathai khubor ha ka Sngi Balang, ka Kong Ampareen ka la ong ba ka MHIS kan ai jingïarap T.5 lak ïa kawei-pa-kawei ka longïing bad kumba 78 percent ki nongshong shnong ki la shah kynthup hapoh ka MHIS, katba ka skhim CM-Care+ pat ka peit kham kyrpang ïa ki jingpang kiba kham bun ka jinglut.
“Ka CM-Care+ jingmang pisa ka long kaba kham heh, kawei-pa-kawei ka longïing kan ïoh T.8 lak; kaba mut ba ka jinglut jong ki nongshong shnong kan kham duna man ka sngi. Ka don ïa ka jingmang pisa kaba kham kyrpang ïa ki longkmie bad ki khyllung ba dang shu kha”, ka la ong.
Ka Kong Ampareen ka la ong ba ka CM-Care+ kan ai jingmyntoi ïa ki paidbah ki bym don pisa shuh na ka MHIS-PMJAY, lane kiba donkam ïa ka jingkyrshan pisa na ka bynta ki jingsumar ba kham shitom ki bym lah ban pynbiang lyngba ka MHIS.
Ka Myntri ka pyntip ruh ba ka rukom pyntreikam ïa ka CM-Care+ kan long ha ki ar kyrdan, kata ha ki kyrdan district, ka jingmyntoi kan long haduh T.2 lak bad ha ki kyrdan jong ka Jylla (State Level) kan long naduh T.2 lak haduh T.5 lak.
Ka Kong Ampareen ka la ong ba la pyntreikam ïa kane ka skhim bad kan kynthup ruh ïa ki longkmie ba dang kha khunlung, kaba donkam ban peit ïa i khunlung ba dang kha haduh 1000 sngi, ïa kaba yn ïarap da ka tnat ka Koit ka Khiah bad ka Social Welfare.
Ka la ong ba na ka bynta ban ïoh jingmyntoi na kane ka skhim ka long kaba donkam ban don ïa u Aadhaar nombar bad pynpaw ba ka long kaba donkam ïa ki paidbah ban pynrung kyrteng Aadhaar.
Ka Myntri ka la ong ba ki nongtrei Sorkar (State & Central) bad ki bahaïing jong ki kim lah ban ïoh jingmyntoi na kane ka skhim thymmai.
