Mawkyrwat, Lber 19
Ki ‘riew shim kabu ki bym don shuh ka mynsiem ïatip lem ha ka imlang-sahlang ki la pynpra dusmon ïa ki mawkynroh rel ha ka surok PWD kaba hap hapoh u pud u sam jong ka shnong Pynden Umjaraiñ, Warsan Lyngdoh ha South West Khasi Hills District.
Katkum ki tyllong khubor ba la ïoh lum la ïathuh ba katei ka jingjia ka la jia ha kine ki khyndiat sngi ba la dep ha ka surok PWD kaba hap hapoh ka jingpeit jong ka tnat PWD Ranikor Division ha kaba ki briew ki bym lah ban ithuh ki la pynpra bad bom naphang ïa ki mawkynroh rel ha baroh arliang ka surok ïa kaba ka ophis ka dang shu dep phah maramot dang shen.
Ha kaba ïadei bad katei ka jingjia, na ka liang ka shnong Pynden Umjaraiñ ka la pynpaw ïa ka jingsngewsih kaba khraw bad ka la pynrem jur ïa ka jingleh riewkhlaw jong kitei ki briew bad ka shnong ka maham tyngeh ruh lada lap ïa kiba donkti ban pynjot ïa kitei ki mawkynroh rel, kin ngat ha ka jingshah pynshitom kaba tyngeh.
