Shillong, Lber 19
U Myntri ba khmih ïa ka tnat Bording (Power) ha ka Jylla, Abu Taher Mondal u la pyntip ba ka MeECL ka dang sah ram ha ka National Thermal Power Corporation (NTPC) haduh T.664 klur, hynrei hadien ba la ïakren ka la pynhiar noh sha ka T.565 klur ïa kaba ka tnat kan pyndep ban siew noh hapoh u snem 2026-27.
Haba kren bad ki lad pathai khubor ha ka sngi Balang, u Myntri u la ong ban pynkhuid noh ïa kane ka ram, ka MeECL ka siew T.15.7 klur man la u bnai bad ha kaba kut u snem 2026-2027, kane ka ram kan khuid noh.
U Mondal u la ong ba ka MeECL ka la pyrshang tyngeh ruh ban phah siew noh ïa bai thang bording jong kito ki nongthang bording ilektrik kiba khlem pat siew.
Ha kajuh ka por, u Mondal u la ïathuh ba katkum ka skhim mab ïa ka bai thang bording ilektrik, ka jingkheiñ ka long T.119 klur, hynrei na kane ka MeECL kan ïoh sa tang T.25 klur.
U la ong ba kito kiba thang hapoh 5KW kin ïoh ïa kane ka skhim mab bai thang bording ilektrik, kaba mut kan long ïa kito kiba thang bording ha ki ïing, ym ïa ki karkhana ne ïa kito kiba leh ïa ki kam khaïi-pateng.
