Shillong, Lber 19
Ka Federation of Khasi Jaiñtia & Garo People (FKJGP) Sengkmie ha ka 19 tarik u Lber, 2025, ka la leit ban ïakynduh bad dawa na u Myntri ba dei khmih ïa ka Tnat Bording ka Sorkar Jylla, u AT Mondal ban khot thungkam noh mardor na ka bynta 255 tylli ki kam ba la mang ne ‘Sanction Post’ ha ka MePDCL.
Haba kren sha ki lad pathai khubor, u President ka seng, Bah Dundee C. Khongsit, u la ong ba ka jingwan pan jingpynshai ka Seng na u Myntri ka dei hadien ka jingïoh jingtip halor ka jingsah thylli ki kam ha kaba ki don haduh 130 tylli ki Sanction Post na ka bynta ki Assistant Executive Engineer (AEE) lane Assistant Engineer (AE) bad 125 tylli ki Sanction Post na ka bynta ki Junior Engineer (JE) ha ka Electrical bad Mechanical Cadres bad ka Sub Cadres kata ha ka Electronic bad Computer Engineer hapoh ka MePDCL.
U Bah Dundee u la ong ba katkum ka jingïoh jingtip jong ka Seng, ka jingthylli kine ki kam ka la don kumba 4-5 snem eiei bad ong ba ki don da ki hajar ngut ki samla kiba lah pyndep ïa ka jingpule ha ka liang ka Engineering hynrei lada na ka liang ka Tnat treikam ka pynslem ha ka ban pyndap ïa ki kam kiba thylli, kan long ka jingduh kaba khraw bha ïa ki samla ka Jylla.
“Ngi wan hangne ban kylli bad kyntu syndon ïa u Myntri ba naka liang ka MeECL ka dei ban khot thungkam noh mardor ïa ki Sanction Post, ngim ong ba kin thaw kam thymmai hynrei naka bynta ki kam kiba lah thylli lypa”, ong u Bah Dundee.
U la ong ruh ba ha ka jingpynbna ba la pynmih da ka tnat treikam ka Sorkar, ka la khot thungkam Contractual haba ki Sanction Post ki don bad haba jubab halor kane ka bynta, na ka liang u Myntri u la pynpaw ba ka Tnat ka ïakynduh jingeh shikatdei eh ha ka liang ka pisa-ka tyngka.
“Ka khubor na ka liang ka Seng ba ngi la ai sha ka Sorkar lyngba u Myntri ka long ba wat shim sting ïa kane ka kam hynrei phi dei ban pyndep mardor ïa kane ka jingdawa jong ngi namar khnang ba ka jingmyntoi kan long na ka bynta u babun balang”, ong u Bah Dundee.
Shuh-shuh, u Bah Dundee u la ong ba lada ka Sorkar ka dang ïai leh kuman halor kane ka bynta, na ka liang ka seng kam banse ban pyrkhat ha ka ban shim noh da kiwei pat ki sienjam.
U la ong ba ym tang kane ka tnat treikam kaba don ïa ka jingpynsah thylli ha ki kam Sanction Post hynrei ki don kiwei ruh ki tnat treikam kiba la sah thylli ha ki kam Sanction Post bad na ka liang ka Seng kan sa tih bniah bha haba ïadei bad kiwei ruh ki tnat treikam ka Sorkar.
Na ka liang u Myntri haba jubab halor kane ka jingbym lah ban thungkam ha ki Sanction Post, u la pynpaw ba na ka liang ka tnat kan sa shimkhia halor kane ka bynta bad pynpaw ruh ïa ka jingshem jingeh ha ka liang ka pisa-ka tyngka ba ka tnat ka ïakynduh.
