Shillong, Lber 20
U Superintendent of Police (SP) ka East Khasi Hills District, Bah Vivek Syiem, u la ong ba ka tnat pulit ka la pynjur bha ïa ka jingpahara bad talasi ïa ki arshaka ha ka por mynmiet namar ka jingjyllei eh ka jingshah tuh ki arshaka hapoh ka Jylla bad kumjuh ka jingdon ka jingñiah khlemakor da ki nongñiah ïa ki arshaka.
“Ngi la pynjur bha ïa ka jingpahara jong ngi khamtam da ka kynhun jong ki pulit kiba pynïaid kali bad ki Special Operation Team (SOT) kiba la pynlong ïa ka jingtalasi kaba manla ka miet namar ka jingjur ka jingshah tuh ki thuk-thuk arshaka bad ka jingñiah khlemakor ïa ki thuk-thuk”, ong u SP.
Haba kren sha ki lad pathai khubor ha ka 20 tarik u bnai Lber, 2025, u SP u la ong ba na ka liang ka tnat pulit ka la khmih ruh ha kaba ïadei bad ka jingpyndait jong ki khynnah samla ïa ki ‘Modified Silencer’ ne ki kor pynsawa ha ki arshaka kaba ju wanrah ïa ka jingdik bad ka jingma ha ka bor ïohsngew jong ki khyllung bad ki briew kiba la noh ka rta.
Haba ïadei pat bad u drok, u SP u la ong ba ka jingïohkem ïa ki nongdie bad nongkhaïi drok hapoh ka Jylla ha ki bnai ba la dep ka la long kaba shyrkhei namar ka jingdawa ïa une u jait jingdih ka la long kaba jur bha hynrei da ka jingtrei borbah jong ka kynhun Anti-Narcotic Task Force (ANTF), ka la lah ban kem ïa kiba bun ngut kiba donkti ha kane ka kam.
Shuh-shuh, u la ong ba ka long kaba donkam ïa ki bor synshar shnong bad ki paidbah ba kin ïatreilang bad ki bor pulit khnang ba yn lah ban tehlakam ïa une u jait jingdih pynbuaid.
Da kaba bynrap ruh ba na ka liang ki bor pulit kin nym lah ban don ha manla ki jaka ban tehlakam ïa u drok namar ki nongdih bad nongkhaïi drok ki ju pyndonkam ruh ïa ki jaka ba ki pulit kim don bad u la ong ba lada ki paidbah ki lap ïa kum kine ki briew kiba dih bad die drok ha kino-kino ki jaka, ki lah ban phone bad ban pyntip sha ki bor pulit.
“Kam dei ka jingshisha ba ki bor pulit kim pynlong ïa ka jingïaid pahara ha kylleng ki jaka hynrei kam long kaba suk ïa ki bor pulit ba kin leit sha manla ki jaka namar kiba pyndonkam ïa u drok ki ju leit ruh ha ki jaka ba ki pulit kim don, kumta da ka jingkitkhlieh lem jong ki paidbah lada ki lap ïa kum kine ki kam, ki dei ban pyntip mar-mar sha ngi”, bynrap u SP.
