Shillong, Lber 20
U Superintendent of Police (SP) ka East Khasi Hills District, Bah Vivek Syiem, u la ong ba ka jingpluh khlaw ha kine ki sngi ka la jia khah-khah bad na ka liang ki bor pynlip ding ruh ki la long kiba la pynkhreh bha da kaba kyrpad ruh ïa ki bor shnong ba kin bthah ïa ki paidbah nongshong-shnong ba kin ym pynïeng satia ïa la ki kali ha ki surok kiba khim namar kan long kaba eh ïa ki kali pynlip ding ban rung shapoh ki shnong-ki thaw lada wan jia kynsan kano-kano ka jingkem ding.
“Ngi la bthah ïa ki bor shnong ba kin nym shah ïa ki paidbah nongshong-shnong ba kin pynïeng ïa ki kali harud jong ki surok namar kan wanrah jingeh ha ka por ba rung ki kali pynlip ding hynrei ki don ki por ruh kiba ngi hap ban shim da kiwei ki sienjam kiba tyngeh kata ban shu khnap noh ïa kitei ki kali kiba ju pynïeng harud surok ha ka por mynmiet”, ong u SP.
Haba kren sha ki lad pathai khubor ha ka 20 tarik u bnai Lber, 2025, u SP u la ong ba ka daw ka jingjur ka jingpluh ki khlaw ka lah ban dei ruh na ka bor mariang hynrei kham bunsien pat ka dei na ka jingleh hi jong ki briew kiba ju bret pathar ïa ki jingdih duma bad ka jingbym pynlip bha ïa ka ding kaba lah pat ban ïalam sha ka jingpluh ki khlaw-ki btap bad ka jingkem ding ki ïing-ki sem.
“Ka jingpluh ka wan jia ka lah ban dei na ka bor mariang ruh hynrei kham bunsien ka ju jia namar ka jingleh bym suitñiew bad ka jingbym phikir jong ki briew”, ong u SP.
U SP u la kyrpad ruh ïa ki paidbah ba kin kiar na ka jingthang khlaw bad kumjuh ruh ban long kiba phikir bha khnang ba kan nym don kano-kano ka jingjia ba sngewsih pat hadien-habud khamtam ha kine ki por ba jur ka lyer bad ka jingtyrkhong ka mariang.
