Shillong, Lber 20
Ka Deputy Commissioner (DC) ka East Khasi Hills District, Kong R.M Kurbah, IAS, ka la ong ba ka jingmut ba la pynlong ïa ka ‘State Level Mock Exercise’ ha ka 20 tarik u bnai Lber 2025, ka long kum shibynta ban pynkhreh bad ban ai jinghikai ïa ki briew kumno ban lait na kino-kino ki jingmynsaw lada wan jia kynsan ki bor lynshop mariang ha kano-kano ka por khamtam lada khie kynsan ka jingkhynñiuh u jumai.
Ka Revenue and Disaster Management Authority ha ka 20 tarik u bnai Lber, 2025, ka la pynlong ïa ka jinghikai kumno ban pyllait im lada wan jia ka jingkhynñiuh u jumai ïa kaba la tip kum ka ‘State Level Mock Exercise’ ïa kaba la pynlong ha baroh ki District bad ki Sub-division.
Ha nongbah Shillong, ïa kane ka ‘State Mock Exercise’ la ïashim bynta naduh ka SDRF, Fire and Emergency Services, ka tnat pulit, DMHO, MPRO, PWD, DSEO, Soil and Water Conservation, MUDA, Water Resources, Indian Red Cross Society bad ki nongtrei mon sngewbha na ka Aapda Mitra, NCCK, NCC, Civil hospital, Ganesh Das MCH Hospital, Bethany Hospital, Nazareth Hospital, Woodland Hospital, Dr. H. Gordon Hospital, Super Care Hospital bad NEIGRIHMS.
Ki jaka pyntreikam na ka bynta kane ka mock exercise kan long ha Buddha Vidya Niketan Secondary School, Polo, ophis ka Soil and Water Conservation, Lawmali, Polo Hills residential area, Market Complex, Polo, Longkmie Gas Agency, Nongmensong, Star Service Station, Mawpat Wahheh, Pynthorumkhrah ha ka jingkieng ban leit sha BK Bajoria, School, ha Wahingdoh bad ha Police Quarter Reserve.
Haba kren sha ki lad pathai khubor ban ai jingpynshai haba ïadei bad ka jingthmu bala pynlong ïa katei ka jinghikai ha ryngkat ka jingïadonlang u Superintendent of Police (SP) ka East Khasi Hills District, u Bah Vivek Syiem, IPS, u Additional Deputy Commissioner, u Bah Ronnie Wahlang, ka DC ka la ong ba ki paidbah ki donkam ban shimkhia bha ïa kane ka jinghikai ha ka ban pynkhreh bha ïalade namar lada ym pynkhreh lypa ha ka por ba biang, lada wan jia kynsan kano-kano ka bor lynshop kan wanrah ïa shibun tylli ki jingjia ba sngewsih.
“Lada jia ei-ei, ka long kaba donkam ban hikai kaei ka sienjam kaba nyngkong eh ban shim ha ka jingjia ba sngewsih. Phi hap ban ïada ïalade shwa da kaba shong bad rieh hapoh ka miej. Dei na kata ka daw ba ngi donkam ïa ka jinghikai namar ïa kum kine kiei-kiei, bun ki paidbah kim ju nang ïa kine”, ong ka DC.
Kala ong ruh ba dei ban hikai ïa ki longïing kumno ba kin don jingshngaiñ nalor ban pynthikna ïa ka jingpynbiang ïa ki mar bam, ka um bad ki dawai bad ki jaiñ-ki nep ki ban neh ym duna ïa ka 78 kynta kat haduh ba ki bor synshar district kin pynkhreh ban pynjlan ïa ki jingïarap kiba donkam.
Halor ka jingdon jingma lyngba ka jingtei ïa ki ïing, ka DC kala ong ba ka long kaba donkam ban pynsngewthuh ïa ki briew, kiba shna ïing thymmai ba kin don ïa ka jingpynkhreh kaba biang bad ban kiar na kaba pynkheiñ ïa ki aiñ shna ïing.
“Ngi don ha ka Zone 5, kaba long ka bym shngaiñ ban shna ïa kano-kano ka ïing, ki don ki kyndon shna ïing bad ki briew kim dei ban pynkheiñ ïa ki bad ki dei ban ïoh ïa ka saiñdur (plan) shna ïing jong ki ban shna da u enjiñiar uba tbit bha ha kine ki jait jingtei”, ong ka DC
Da kaba ai nuksa ruh ïa ka jingjia pluh ding kaba la jia ïa ka ïingmane Balang U Blei (M&A) kaba don ha Qualapatty kaba la shim haduh 2 ngut ki mynsiem briew, ka jingjia pluh ding ha ka skul KJP Higher Secondary School kaba don ha Mission Compound nalor kiwei-kiwei ki jingjia pluh ding, ka DC kala ong ba ka jingeh ban wan pynlip ïa ka ding ka dei namar ka jingpynïeng thurmur ki briew ïa ki kali hapoh ki shong-ki thaw kaba la buh jingeh shikatdei eh ïa ki kali pynlip ding ba kin rung sha ki shnong-ki thaw.
Haba kylli halor ka jingpynlong ïa kane ‘Mock Drill’ kaba la ktah ruh ïa ka ïaid-ka ïeng jong ki paidbah ha ka por mynstep khamtam eh jong ki khynnah skul kiba dei ban poi sha ki jaka pule haka por kaba biang, naka liang ka DC kala ong ba ka jingkhih kynsan u jumai kam ju ap satia ïano-ïano ruh, kumta ki Dorbar Shnong bad ki paidbah ka Jylla ki dei ban long kiba ïaishah bad ban don ka mynsiem ban ïatreilang.
