Shillong, Lber 20
Ka Khasi Students’ Union (KSU) ha ka Sngi Palei ka la rakhe ïa ka jingdap 47 snem ha ka jingïaid lynti kum ka seng ki samla pule, bad ïa kane ka jingrakhe la pynlong ha u mot jong u Soso Tham uba don ha Lachumiere, Shillong ha kaba la shim bynta da ki spah ngut ki nongïalam ka seng.
Haba kren ha kane ka sngi, u President rangbah ka KSU, Bah Lambokstarwell Marngar u la ong ba ka KSU kam ju kynrandien ha ki jingïakhun na ka bynta ka daw bah jong ka jaidbynriew hapdeng ki jingtynjuh bad ki jingshah pyntyrha ba laiphew jait.
Haba kynthoh ïa ki Nongmihkhmat paidbah halor ki aiñ ba ïada ïa ka Jylla, u la ong wat kynthoh tang ïa ka KSU ka la leh aïu, hynrei kylli lang ïa kita ki Nongthaw Aiñ ki la leh aïu haba la phah ïa ki ban thaw bad pyntreikam ïa kita ki aiñ ban ïada ïa ka ri bad ka jaidbynriew.
U Nongïalam ka KSU u la ong ba katba dang ïakren ïa kita ki aiñ ban ïada ïa ka jaidbynriew, bluit mih kita ki briew kiba ong ba ki kwah lynti rel hapoh ka Bri Hynñiewtrep.
“Ko! ki ‘lei san snem wat pyrshang ban ai ding ïa ka KSU, ngi kwah ban pyntreikam ïa kita ki aiñ kiba ngi khmih lynti kum ka jaidbynriew baroh kawei. Lada ki leh matlah bad ki pyrshang ban thom bor ïa kaei kaba ngi pyrshah, kynmaw ba ha u snem 2017 ka dei tang ka jingsdang, hynrei lada ki thom bor sa mynta ka kynti, lada dei ïa ki dkhot jong ka KSU shihajar ngut ban rung ha along ngi long kiba la kloi”, la ong u Bah Lambok Marngar.
U la ong ba ki don ki khep ba ki briew Sorkar ki la pyrshang ban pharia bad thied ïa ki nongïalam ka KSU bad wat ban shim ïa ka jingim jong ki, hynrei ki dkhot ka seng ki khlem pyndem satia namar ba ki ïeng beit ha ka hok bad ka jingshisha.
U la pynkynmaw ba ka KSU ka la ïakhun pyrshah ïa ka jingwan rung buhai shnong ki mynder, ka la ïakhun pyrshah ïa ka lynti rel, ka la ïakhun pyrshah ïa u uranium bad kiwei ki mat naduh ki snem ba la leit bad kan dang ïai ïakhun nangne shakhmat ruh.
U Bah Lambok u la ong ba 12 snem mynshwa la sdang ka jingpynkynmaw ïa ka Sorkar ba ka seng ka kwah ban pyntreikam ïa ka Inner Line Permit (ILP), bad ha u snem 2019 ka Sorkar Jylla ka la mynjur ïa ka rai ‘resolution’ ban dawa ïa ka ILP, hynrei kaba sngewsih ka long ba haduh mynta ka Sorkar Jylla ka la riehtngen ha kata ka jingap ïa ka rai na ka Sorkar India.
U Nongïalam ka KSU u la buh jingkylli ruh ïa ka jingbym lah jong ka Sorkar Jylla ban pyntreikam ïa ka Meghalaya Residents Safety and Security Act (MRSSA), 2016.
“Ka aiñ kaba la don lypa, ka MRSSA shano ka don bad balei ka Sorkar kam lah ban pyntreikam?”, u la buh jingkylli.
U Bah Lambok Marngar u la ong ba 47 snem ka la jlan palat ka lynti namar ki kam ki dang long tang khyndiat.
“Ngan pynthikna nangne shakhmat ba kaei ba ngi leh, kaei ba ngi kren bad kaei ba ngi pyrshang kan long ka jingbha bad ka jingshngaiñ na ka bynta ka ri bad ka jaidbynriew baroh kawei”, la ong u Nongïalam KSU.
