Shillong, Lber 20
Ka jingshah tuh jong ki ïing ki sem ha kylleng ki bynta jong ka sor bad khap sor ka dang jia bad ïai bteng na kawei ka por sha kawei pat, haduh ba ka la pynshongsyier bad buh ha ka jingbym shngaiñ ïa ki trai ïing ne ki trai kali.
Katkum ka khubor na ki pulit la ong ba ka samla Barisha Rymbai ka la ujor sha ki pulit ba ha ka 17 tarik mynta u bnai, ki runar bym lah ban ithuh ki la prong tuh hapoh ka ïing ka jong ka, kaba don ha Pynthorbah Block-II, Shillong bad ban tuh ïa kawei ka laptop, ATM card bad ki kot ki sla kiba donkam.
Kumjuh na ka liang jong u Bah Romeo Nongkhlaw u la ujor sha ki pulit ba hapdeng ka miet jong ka 17 bad 18 tarik mynta u bnai, ki runar bym lah ban ithuh ki la tuh ïa ka arshaka ka jong u, kaba don ïa u registration number ML05-V-4465 na phyllaw jong ka jaka sah ka jong u, kaba don ha ka shnong Rangbihbih Mylliem ha East Khasi Hills.
U Khayaivam Ngashangya ruh u la ai ka jingujor ba ha ka por mynsngi jong ka 18 tarik mynta u bnai, ki runar bym lah ban ithuh ki la prong tuh hapoh ka ïing ka jong u, kaba don ha Lapalang, Mawbynna, Shillong bad ban tuh ïa kawei ka Laptop, ear pods, ka mobile charger bad ka pisa kaba long T.2,000/-.
Na ka liang jong ka Kong Ribasuklang Kharbuki ruh ka la ujor sha ki pulit ba ha ka 16 tarik mynta u bnai, ki runar bym lah ban ithuh ki la prong tuh hapoh ka ïing jong ka, kaba don ha Nongmensong Dongkamon, Shillong bad ban tuh ka pisa kaba long T.13,000/-, ki jaiñ ki nep bad ki kot ki sla kiba bun. Shuh shuh nalor kane, ha ka 18 tarik mynta u bnai, ka Kong Ribasuklang ka la lap ba ka pisa kaba long T.19,000/- ka la shah sei na ka bank account jong ka, khlem ka jingtip ka jong ka.
Katba ka samla Mrinmoyee Hazarika ruh ka la ujor ba ha ka 18 tarik mynta u bnai, ki runar bym lah ban ithuh ki la prong tuh hapoh ka ïing jong ka, kaba don ha Nongthymmai, Shillong bad ban tuh haduh lai tylli ki mobile phone, ki kot ki sla ba donkam bad ruh ka pisa kaba long T.3000.
Katba na ka liang jong u Anshit Kakkar ruh u la ujor sha ki pulit ba ha ka 5 tarik mynta u bnai, u la lap ba ki runar bym lah ban ithuh ki la tuh ïa ki FRC cables kiba shongdor haduh kumba T.69,000 na Lumshatsngi, Kench’s Trace, Laban, Shillong.
