Shillong, Lber 21
U Symbud Myntri Rangbah ka jylla ba khmih ïa ki tnat Pynroi Sor, Bah Sniawbhalang Dhar, u la ong ba ka Sorkar kan sa pyntreikam noh shen ïa ka Meghalaya Urban Parking Policy, 2025 ban teh lakam ïa ka jingpynïeng kali pathar ha ki rud surok ha ki jaka sor, ka ban ïarap pyllait pat na ka dheng kali khamtam ha nongbah Shillong.
Haba kren sha ki lad pathai khubor ha ka Sngi Thohdieng, u Myntri u la ong ba ka jingpyntreikam ïa kane ka polisi pynïeng kali kan ïarap ban pynduna ïa ka jingïeng kali ha surok bad ym don ba lah ban shu pynïeng kali kumto ha ki rud surok.
“Namar ka jingpynïeng pathar jong ki briew ïa ki kali ka pynlong ïa ki daw ba wanrah ïa ka jingkhapngiah kali hapoh sor bad pynlong ïa ka Sorkar ban wanrah ïa kane ka polisi. Ka tnad kan sa peit bniah ïa ki jaka ba lah ban shah pynïeng kali harud surok”, u la ong.
U Symbud Myntri Rangbah u la ong ruh ba katkum kane ka polisi pynïeng kali ban pyntreikam da ka Sorkar, yn thaw lad ban shah pynïeng kali ha ki rud surok, hynrei kan don ka jinghap siew pat da ka dor bai pynïeng kali bad ki paidbah kin ym lah shuh ban shu ïeng pathar namar yn ithuh ïa ki jaka ha ki rud surok kiba ki paidbah ki lah ban pynïeng kali bad ki bym lah ban pynïeng kali.
Ha kajuh ka por, na ka liang u Bah Sniawbhalang u la ong ba ka daw bah ba ka Sorkar ka la rai ban pynkynriah noh ïa ki ophis Sorkar kynthup ïa ka Secretariat sha Sor thymmai ha Mawdiangdiang ka dei namar ka jingkhapngiah palat jong ka sor Shillong.
“Ha ki khyndiat snem ban wan ngin sa lah ban pynkynriah noh ïa ka Secretariat sha New Shillong, kane kan ïarap shibun ban pynkylluid ïa ka Shillong. Ïa mynta ngi hap ban ïashah namar na ka liang ka Sorkar ka khlem shong kli kti, hynrei ka pyrshang ban thaw ïa ki lad ban pyllait na ka jingkhapngiah”, la ong u Symbud Myntri Rangbah.
