Shillong, Lber 21
Ka Sorkar Jylla ka la bthah ban pynsangeh noh shwa ar bnai ïa ka jingdonkam ba hap ban ai injek na ka bynta ka jingai syrnot sngi-kha khnang ban ïoh pynrung kyrteng Aadhaar bad pynthikna ba kan ym don jingthut ïa ki jingmyntoi jong ka Integrated Child Development Services (ICDS) ïa baroh ki khunlung ba dang shu kha.
Ka jingpynbna ba la pynmih da u Commissioner & Secretary ka tnat ka Koit ka Khiah, Dr Joram Beda ha ka 18 tarik Lber ka la bthah ba baroh ki District Registrar of Birth & Death, ba kin ai beit ïa ki syrnot sngi-kha sha baroh kiba aplai khlem da peit ïa ka jingai ne pat ai injek ïa ki khunlung.
Ïa ka jingai injek lah ban buh jingthoh la ka jong bad sa buddien pat hadien kum shi bynta na ka jingleit ai injek kylleng ki jaka, hynrei ym dei pat ban pynïasoh sha ka jingai syrnot sngi-kha.
Ki Nongtrei ka Tnad ka Koit ka khiah bad ICDS ki dei ban pynbteng ïa ka jingïalap ai injek ban pynthikna ba baroh ki khunlung kin ïoh ïa ki injek hapoh ka por kaba biang, bad ïa kane ka polisi yn shong bishar biang haba kut jong kine ar bnai ban peit ïa ka jingtreikam bad ban lah shim rai ruh la yn dang bteng ïa ka kam lane yn pynkylla.
Ïa kane ka rai la shim hadien ka jingïoh jingtip jong ka Sorkar ba ka don ka kyndon ba hap ban ai injek shwa ïa ki khunlung na ka bynta ban ïoh ïa ka syrnot sngi-kha, kaba pynlong ban slem ha ka ban pynrung kyrteng ïa ki khunlung ba dang kha.
Ka Aadhaar card ka dei kawei na ki kot donkam ba kongsan bha ban ïoh ïa ki jingmyntoi hapoh ka ICDS, kynthup ïa ka Supplementary Nutrition Programme, Healthcare, ka jingai jinghikai dang kloi ïa ki khunlung, kaba lah ban pynduh ïa ka hok jong ki khunlung khynnah.
