Shillong, Lber 21
U President ka Voice of the People Party, Bah Ardent M Basaïawmoit uba dei u MLA ka Nongkrem konstitwensi u la ïania bad u Bah Robertjune Kharjahrin uba dei nong-ïasaid aiñ ha ka jingïatai nia halor ka Article 371 bad ka 6th Schedule kaba la pynïaid da ka Depart-ment of Political Science, Sankardev College, Shil-long ryngkat ka jingïatreilang bad ka Q&A Channel kaba la long ha ka Sngi Thohdieng ka 21 tarik u Lber 2025 ha Auditorium Hall Sankardev College Shillong.
Kane ka jingïania u Bah Ardent bad Bah Robertjune Kharjahrin ka dei ha ka por ba u Bah Robertjune Kharjahrin u dang ai ïa ka jubab haba la buh jingkylli da ki samla pule hynrei u Bah Ardent u la knieh ktien bad hangne ka la don ka jingïapyni nia mar kylliang bad khatduh la pynjai-jai noh da u Bah Erwin Sutnga uba dei nongïasaid aiñ uba la shong hapdeng.
Ha kane ka sngi ki nongai jingkren halor katei ka phang ba la kdew haneng ki long u President ka VPP, Bah Ardent Basaïawmoit bad ar ngut ki nongïasaid aiñ, kita, u Bah Erwin K Sutnga bad Bah Robertjune Kharjahrin ba la pynïaid da u Dr. Benjamin F Lyngdoh uba dei Associate Professor, NEHU.
Ha kane ka sngi kiba wan sngap ïa kane ka jingïatai ki kham bun na ki samla pule ka Sankardev College bad kiwei de ki kolej kiba la shah khot, ki nonghikai bad kiba shah khot sngewbha ha ka jingïadonlang ka Principal Sankardev College, Dr. Eureka Mawlong.
Ha kane ka jingïatai nia kine baroh lai ngut ki la pyni la ka jong ka nia halor ka article 371 bad ka 6th schedule.
Haba pynkut ïa ka jingkren, u Bah Ardent u la kubur ïa ka jingkylli u nongpynïaid ïa ka jingïatai nia ba lada ka VPP kan wan ha ka bor ha u snem 2028 kan wanrah ïa ka mat ban shim rai ha ïingdorbar halor ka Article 371 namar ka rukom pyrkhat ka VPP ka dei ka mynsiem ïakhun, namar kan ym leit sha ka Sorkar India da ka jingartatien, hynrei ka dei ka hok jong ka jylla ba dei ban ïoh.
U la ong ba ka seng kan ym don ka jingpyrkhat ba lada ki leit kin ym ïoh, hynrei u don jingkyrmen ban ïoh beit namar ka jaitbynriew ka don la ka jong ka khana haba mynshwa ki rung sha ka Sorkar India ka dei lyngba ka Agreement of Accession.
