Shillong, Lber 21
U Symbud Myntri Rangbah ka Jylla ba khmih ïa ka tnat Pynroi Sor, Bah Sniawbhalang Dhar, u la pyntip ba ïa ka ïew ba la tei da ka Sorkar ha Polo yn sa lah ban pyndep noh ha u bnai Nohprah mynta u snem.
Haba kren sha ki lad pathai khubor ha ka Sngi Thohdieng, u Bah Sniawbhalang u la ïathuh ba katei ka ïew ka dei kaba heh bad kan don shibun ki dukan.
“Ha kano ka rukom yn pynïaid ïa katei ka ïew ngin dang hap ban shong pyrkhat, mynshwa ngi la leh da ka EOI (Expression of Interest)”, u la ong.
U la ïathuh ba dang shen u la leit ban jurip hi ïa kitei ki ïew kum shi bynta ban pynsted ïa ka kam.
“Ka dang don sa khyndiat ki kam kiba dang sahteng bad tang shu dep ban pynbeit ïa kata ngin sa plie noh ïa ka ïew. Nga tharai ha u bnai Nohprah ngin lah ban pyndep ïa kane ka projek,” la ong u Symbud Myntri Rangbah.
Haba kylli, la ïa ki nongdie madan yn shah ne em ban shong dukan ha shilynter katei ka jingtei, na ka liang u Bah Sniawbhalang u la ong ba ka kam ba ïadei bad ki nongdie madan ka dang ïaid mynta, bad yn sa shim rai kloi katba lah ha ka rukom kaba dei.
