Shillong, Lber 21
U Myntri Rangbah ka Jylla, Conrad K. Sangma ha ka Sngi Thohdieng u la ong ba ka Sorkar Pdeng ka la pyllait ïa ka sien siew kaba khatduh jong ka baibam kaba kot sha ka T.85.0779 klur, ka ban ai jingmyntoi ïa 27,327 ngut ki samla pule kiba dei hok ban ïoh jong ka Jylla.
Ïa ka pisa na bynta kane ka baibam la pyllait lyngba ka skhim ba la ai kyrteng ‘Umbrella Scheme of Post Matric Scholar-ship for ST Students for the Academic Session 2023-2024’.
Haba ai ïa ki jingtip ba bniah halor ka jingpyllait ïa ka baibam, u Sangma u la ïathuh ba baroh ki samla pule kiba la aplai na bynta kane ka skhim ki long 76,755 ngut.
U Myntri Rangbah ka Jylla ha ka rynsan lad pathai ‘X’ u la ong ba ka sien siew ka banyngkong kaba long T. 42.32 klur la pyllait ha ka 24 tarik Jylliew, 2024, kaba la ai jingmyntoi ïa 17,364 ngut ki samla pule hapoh kane ka skhim.
Ha kajuh ka por, ha ka 20 tarik u Naiwieng, 2024, la pyllait ïa ka sien siew ba ar – T.66.67 klur, kaba la ai jingmyntoi ïa 32,064 ngut ki samla pule.
“Ka sien siew ba lai bad kaba khatduh kaba long T.85.0779 klur (kaba la pyllait mynta ka sngi) kan ai jingmyntoi ïa 27,327 ngut ki samla pule kiba dei hok ban ïoh jong ka Jylla. Ka pisa kan poi ha ki ‘account’ jong ki samla pule hapoh 1-2 sngi ban wan,” la ong u Sangma.
Shuh shuh ka Sorkar Jylla ka kut jingmut ban pynbha bad pynsted ïa ka rukom pyllait baibam man u snem, kum shi bynta ban pyntikna ïa ka jingkyrshan kaba kloi na bynta ki samla don sap jong ngi, la bynrap u Myntri Rangbah.
